Буудлагын 2022 оны ДАШТ Египетийн нийслэл Каир хотноо өчигдөр өндөрлөлөө. 14 хоног үргэлжилсэн уг тэмцээнээс манай тамирчид ганзага дүүрэн буцав. 50 метрийн сонгомол гар бууны холимог багийн дасгалд 12 баг өрсөлдсөнөөс Ц.Мөнхзул, Э.Даваахүү гэсэн бүрэлдэхүүнтэй Монголын баг 539 оноогоор хоёрдугаар байрт жагсаж мөнгөн медаль хүртсэн юм. Ц.Мөнхзул, Э.Даваахүү нар, шууд финалд өрсөлдөх эрхээ авч улмаар шигшээ буудлагад Хятадын багт 17:9-өөр дийлдэн мөнгөн медаль хүртлээ.
Энэ амжилт ДАШТ-ээс хүртсэн монголчуудын тав дахь медаль болж байна. Гавьяат тамирчин Д.Мөнхбаяр 1998 оны ДАШТ-ээс хувийн төрөлд анхны алтан медалийг хүртсэн бол О.Гүндэгмаа 2006 оны ДАШТ-ээс хувийн төрлөөр хүрэл медалийн эзэн болж байв. Мөн 1998 оны ДАШТ-ээс Д.Мөнхбаяр, О.Гүндэгмаа, Д.Оюун гэсэн бүрэлдэхүүнтэй баг хүрэл медаль, 2014 онд О.Гүндэгмаа, Ц.Мөнхзул, Т.Баярцэцэг нар багаараа мөнгөн медаль хүртэж байжээ.
