Улаанбаатар хотын цэвэр усны нөөц хомстож байгаа талаар жил бүр л ярих болсон. Тиймээс хаягдал гэх тодотголтой усаа дахин хэрхэн ашиглах гэдэг асуулт урган гарч байгаа билээ. Энэ талаар албаны хүмүсийн байр суурийг хүргэж байна.
Саарал усыг ашиглахад МСС-тай хамтран ажиллана
БОАЖЯ-ны Усны бодлого, зохицуулалтын газрын дарга Г.Хоролмаа:
-Энэ жилийн усны өдрийг “Газрын доорх ус” уриатайгаар тэмдэглэн өнгөрүүлнэ. БОАЖЯ-наас усыг дахин, эргүүлэн ашиглах чиглэлийг илүү дэмжин ажиллаж байна. Тиймээс энэ талын стандартыг 2018 онд батлуулан гаргаж, есөн чиглэлээр саарал усыг ашиглахаар болсон. Үүнд, үйлдвэрлэл, үйлчилгээний чиглэлээр гэхэд нүүрс угаах, зам талбайн тоос шороог дарах, бетон зуурмаг бэлтгэх, ДЦС-ын хөргөлтийн систем, ариутгах татуургын нэгдсэн сүлжээнд ашиглах, түймэр унтраахад хэрэглэх боломжтой гэж үзсэн. Олон улсын ISO-9000 стандартын хүрээнд газар тариалангийн усалгаанд ашиглах боломжтой байна. Энэ хүрээнд Дэлхийн банкны Усны нөөцийн бүлэг 20/70-тай хамтарч “Амгалан” дулааны станцын өргөтгөл дээр хөргөлтийн системд MCS компанийн хаягдал усыг ашиглаж байна.
