Бүгд Найрамдах Турк Улсаас Монгол Улсад суугаа онц бөгөөд бүрэн эрхт элчин сайд Зафер Атешыг хүлээн авч уулзан хоёр орны хөдөө аж ахуйн салбарын хамтын ажиллагааг өргөжүүлэх талаар ярилцлаа.
Манай улс малын гаралтай түүхий эдийн хангалттай нөөцтэй бөгөөд энэхүү нөөцийг эдийн засгийн эргэлтэд оруулахад бусад улс орнуудтай өргөн хүрээнд хамтран ажиллах боломжтой. Тиймээс ноос ноолуур, арьс шир, малын гаралтай дайвар бүтээгдэхүүнийг боловсруулах чиглэлээр Турк улстай хамтран ажиллах саналтай байгаагаа илэрхийлэв.
Турк улс нь вакцин үйлдвэрлэлээр туршлагатай учраас мал эмнэлгийн салбарт хамтран ажиллах,“Хөдөө аж ахуйн салбарт хамтран ажиллах удирдах хороо”-г нэн даруй байгуулж, үйл ажиллагааг нь эрчимжүүлэх,Монгол Туркийн хамтарсан мал аж ахуй, газар тариалангийн практик сургалтын төвийг байгуулах зэрэг саналуудыг мөн дэвшүүлсэн юм.Туркийн улсын элчин сайд Зафер Атеш дээрх саналуудыг дэмжиж хамтран ажиллахаа илэрхийлээд ялангуяа сургалтын академи байгуулах, Турк улс руу Монголоос мах импортлох, Турк улс руу гаргаж буй арьс ширний хэмжээг нэмэгдүүлэх чиглэлд онцгойлон ач холбогдол өгч байгаагаа хэллээ.
Бид уулзалтын төгсгөлд Турк болон Монголын арьс ширний салбарын аж ахуйн нэгжүүдийг хооронд нь шуурхай холбон өгөхөөр тохиролцов.
Мөн хоёр улсын хамтарсан малын гаралтай түүхий эдийг боловсруулах үйлдвэр барьж байгуулахад Монгол Улсын зүгээс хамтран ажиллахад бэлэн байгаагаа илэрхийллээ.
