МҮЭ-ийн холбоо, Монголын Боловсрол, ШУ-ны ҮЭ-ийн холбооны Сургуулийн өмнөх боловсролын ҮЭ-ийн хороо болон хөдөө орон нутгийн ҮЭ-ийн гишүүд энэ сарын 17-нд жагсаал хийсэн. Тодруулбал, уг жагсаалд ҮЭ-ийн 8000 гаруй гишүүн цуглаж, Монгол Улсын Засгийн газарт шаардлага хүргүүлж байгаагаа илэрхийллээ.
Тэд энэ оны нэгдүгээр сарын 1-нээс эхлэн хэрэгжиж эхэлсэн Засаг, захиргаа, нутаг дэвсгэрийн нэгж, түүний удирдлагын тухай хуулийн 20.1.18 дугаар заалтыг хүчингүй болгохыг шаардсан юм. Хуулийн заалтад орон нутгийн өмчийн боловсрол, эрүүл мэнд, нийгэм, соёлын байгууллагуудын барилга, байгууламж, хөдлөх хөрөнгийн ашиглалт, засвар, үйлчилгээг орон нутгийн чиг үүрэгт хамааруулж, тухайн шатны төсвөөс санхүүжүүлэхээр тусгасан байгаа юм. МҮЭ-ийн холбооноос ТҮ-1-3 зэрэглэлээр цалинждаг ажилтнуудын ажлын байрны баталгаа, нийгмийн хамгааллын асуудалд хүндрэл учруулж байгаа талаар Монгол Улсын Ерөнхийлөгч, УИХ, Засгийн газарт шаардлага хүсэлтийг удаа дараа хүргүүлсэн боловч өнөөг хүртэл тодорхой шийдвэр гаргаагүй аж.
Иймд МҮЭ-ийн холбооноос Засаг, захиргаа, нутаг дэвсгэрийн нэгж, түүний удирдлагын тухай хуулийн 20.1.18 дугаар заалтыг хүчингүй болгох хүртэл, тэмцлийн үйл ажиллагааг хуулийн хүрээнд зохион байгуулж байгаа юм байна. Тус холбооны шаардлагыг хүлээн авахгүй байгаа тул ийнхүү жагсаал зохион байгуулж, Монгол Улсын Их хурал, Засгийн газарт шаардлага хүргүүлж байгаагаа МҮЭХ-ны ерөнхийлөгч С.Эрдэнэбат хэлсэн юм.
МҮЭХ-ны шаардлагад:
-"МҮЭ-ийн холбоо, Монголын Боловсрол, Шинжлэх Ухааны ҮЭ-ийн холбоодоос хүргүүлсэн шаардлагын хариуг ирүүлэх,
-Багш ажилчдын хөдөлмөрийн үнэлэмж цалинг бодитоор нэмэгдүүлэх,
-Монгол Улсын Засаг, захиргаа, нутаг дэвсгэрийн нэгж, түүний удирдлагын тухай хуулийн 20.1.18 дугаар заалтыг нэн яаралтай горимоор хүчингүй болгох,
-Шаардлагын хариуг 2022 оны дөрөвдүгээр сарын 1-ний дотор ирүүлэх" гэжээ.
