ОХУ Украинд цэргийн үйл ажиллагаа явуулж эхэлснээс хойш буюу хоёрдугаар сарын 25-наас эхлэн манай улс иргэдээ татан авч эхэлсэн. Өчигдөр буюу гуравдугаар сарын 2-ны байдлаар эх орондоо ирэх хүсэлт гаргасан иргэдээ Украинаас бүрэн гаргаж чаджээ. Тодруулбал, хамгийн сүүлд Харьковт суралцаж байсан 15 оюутныг өчигдөр 18 цагийн орчимд Польшийн хилээр оруулжээ. Ингэснээр хүсэлтээ гаргасан ний 58 иргэнээ Польшийн хилээр татан авч, эх орондоо авчрах ажиллагааг Монгол Улсын ГХЯ, Польшийн ЭСЯ болон бусад байгууллага, хүмүүстэй хамтран амжилттай зохион байгуулж байна. Иргэдээ татан авахад Польш улсад суугаа монгол иргэдийн төлөөлөл, Украин дахь Монгол Улсын өргөмжит консул ихээхэн үүрэг гүйцэтгэжээ.
Польш руу татан авсан иргэдээс 18 нь өчигдөр Монгол руу ниссэн бөгөөд 3 нь өчигдөр эх орондоо ирсэн юм байна. Үлдсэн 15 иргэн өнөөдөр ирэх аж. Түүнчлэн Киевээс гурван иргэн эх орондоо ирэх хүсэлт нэмж гаргасан байна. Холимог гэр бүл, эсвэл өндөр настай гэх мэт шалтгаанаар манай улсын 20-иод иргэн Украинд үлджээ.
