Их эзэн Чингис хааны хамгийн алдартай эш хөргийг 1278-1279 оны хооронд Хорихасун хэмээх монгол зураач бүтээсэн гэж үздэг. Судлаачдын үздэгээр энэхүү хөргийг Чингисийн ач хүү Хубилай хааны шууд зааварчилгаа, Их хааныг нүдээр харж байсан хүмүүсийн дурсамж, тодорхойлолтод тулгуурлан зуржээ. Өнөөгийн ойлголтоор “Ам зураг” гэж нэрлэж болох уг бүтээл нь Чингис хааны дүр төрхийг хамгийн бодитой хадгалсан хөргүүдийн нэгд тооцогддог. Тухайн үед эзэнт гүрний зарим хаан, хатдын хөргийг мөн бүтээж, тахилгын сүмд залан шүтэх уламжлал тогтжээ.
Эдүгээгээс даруй 740 жилийн түүхтэй энэхүү үнэт бүтээлийн эх хувь өдгөө Тайваньд хадгалагдаж байна. Тайванийн Үндэсний хааны ордон музейн хосгүй үнэт үзмэрүүдийн нэг болжээ. Тус музей ирэх долоодугаар сарын 2-7-нд Чингис хаан болон Юань гүрний хаад, хатдын хөргийг олон нийтэд дэлгэн үзүүлэхээр болсон байна. Эдгээр бүтээлийг хамгийн сүүлд 15 жилийн өмнө олон нийтэд үзүүлж байсан бөгөөд энэ удаагийн үзэсгэлэн түүх, соёлын өвийг сонирхогчдын анхаарлыг ихээр татаж байгаа юм.
