БНАСАУ-ын удирдагч Ким Чен Ун мягмар гарагт Бээжинд хуягласан ногоон галт тэрэгтэйгээ хүрэлцэн ирсэн. Хятадын албаны хүмүүс түүнтэй гар барин мэндчилж байх үед түүний араас эелдэгхэн инээмсэглэн, хар хувцастай, үсээ боосон залуу охин явж байхыг хүмүүс анзаарчээ. Энэ нь удирдагчийн нууцлаг охин Ким Жү Ае гэж таамаглаж байна. Тэрээр олон жилийн туршид ихэвчлэн цэргийн холбогдолтой арга хэмжээнүүдэд олон нийтийн өмнө гарч ирдэг байсан ба түүнийг яагаад Бээжинд авч ирсэн нь Ким ирээдүйн залгамжлагчаа бэлдэж байна гэсэн урьдын таамгийг дахин дэвшүүлэхэд хүргэж байна. Охины гадаадад хийх анхны олон улсын хэмжээний аялал нь Хятадын удирдагч Ши Жиньпиний цэргийн хүчээ гайхуулах, ОХУ-ын Ерөнхийлөгч Владимир Путин зэрэг автократуудын хамт мөр зэрэгцэн зогсох парад байгаа нь учиотай гэж үзэх талууд байна.
Ким Жү Ае охин 2022 онд тив алгасах баллистик пуужин (ICBM) хөөргөх ажиллагааны үеэр аавыгаа дагалдан гарч ирснээр дэлхийд танигдсан. 2023 онд хэд хэдэн удаа олон нийтийн өмнө гарч ирсэн нь голдуу цэргийн жагсаал, арга хэмжээ байв.Тухайн үед шинжээчид түүнийг эдгээр арга хэмжээнд оролцсон нь Хойд Солонгос зэвсгээ, тэр дундаа цөмийн хөтөлбөрөө хатуу барьж, Кимийнхэн тус улсын цэргийн хүчний төвд хэвээр байна гэсэн тодорхой мессежийг өгсөн гэж шинжээчид үзэж байсан юм.
