Өчигдөр буюу 2021 оны 12.20-нд Монголын ФМ Радиогийн Нэгдсэн Холбооны удирдлагууд, Харилцаа Холбооны Хороотой хамтарсан хурал зохион байгууллаа. Тус хуралдаанаар 17 жилийн дараа 2 дахь удирдах зөвлөлөө шинэчлэн сонгосон юм.
Тэргүүнээр сонгогдсон О.Цацрал нь 2002 онд Дархан уул аймгийн 104.5 радиогийн хөтлөгчөөр ажлын гараагаа эхэлсэн тэрээр 2007-2014 онуудад Улаанбаатар хотноо 105.5 болон Их Монгол фм 99,7 радиогийн захирлаар ажиллаж байжээ.
Ийнхүү 20 гаруй жилийн хугацаанд Радиогийн салбарт ажиллаж буй О.Цацрал нь Монголдоо химич, технологич, сэтгүүлч мэргэжлээр бакалаврын зэрэг хамгаалсан бол АНУ-д Радио телевизийн кино продсер, Бизнесийн удирдлагаар мастераа хамгаалсан байна.
Мөн АНУ, Лос-Анжелес хотын Hollywood Universal- 90.7 ФМ радиод туслах хөтлөгчөөр ажиллаж байгаад 2021 оны дөрөвдүгээр сараaс эх орондоо эргэн ирж Их Монгол Радио-99.7-ийн захиралаар ажиллаж байгаа юм.
Харин Монголын ФМ Радиогийн Нэгдсэн Холбооны Гүйцэтгэх захиралаар Star 92.5 фм радиогийн захирал Э.Уянга сонгогдсон бол төлөөлөн удирдах зөвлөлд UBM 89.3 радиогийн захирал А.Мягмарсүрэн, Autо Radio -96.3 радиогийн захирал Э.Эрдэнээ, MGL радиогийн захирал М.Сүрэнхлам нар, Хяналтын зөвлөлд Best FM-ийн захирал П.Шинэчимэг, Арга билиг 95.7 радиогийн захирал н.Дэлгэрдалай, н.Баярчимэг нар сонгогдсон байна.
