Өнөөдөр казах түмний Наурызын баяр тохиож байна. Энэ өдрийг тохиолдуулан Монгол улсын сайд Э.Одбаяр Эх Монгол нутагтаа болон дэлхийн улс орнуудад амьдарч ажиллаж, үндэсний соёл, зан заншлаа дархалсаар буй казах түмэнд баярын мэндчилгээ дэвшүүллээ. Тэрээр,
-2024 оны Улсын Их Хурлын сонгуулийг холимог тогтолцоогоор, бүсчилж томсгосон тойргоос зохион байгуулж, 126 гишүүнтэй шинэ парламент бүрдсэний 5 гишүүн нь казах түмний төлөөлөл болж сонгогдсон байдаг.
Улсын Их Хурлын 2024 оны сонгуулийн үр дүнд байгуулагдсан хамтарсан Засгийн газрын үйл ажиллагааны хөтөлбөрт баруун бүс нутагт дэд бүтэц, аялал жуулчлал, тээвэр логистикийн салбарын хөрөнгө оруулалт, бүтээн байгуулалтыг эрчимжүүлэхээр тусгаж, баруун бүсийг “Эрчим хүчний төрөлжсөн, байгалийн аялал жуулчлалын дэд бүс” болгон хөгжүүлэхээр төлөвлөж байна.
Энэ хүрээнд Асгатын мөнгөний ордыг эдийн засгийн эргэлтэд оруулах асуудлыг судлах, Цагааннуур боомтын хүчин чадлыг нэмэгдүүлэх, Даянгийн боомтыг байнгын ажиллагаатай болгох, Алтай таван богдыг түшиглэсэн аялал жуулчлалын дэд бүтцийн бүтээн байгуулалтуудыг эрчимжүүлэх шийдвэрүүдийг гаргаад байгаа юм.
Мөн баруун бүсийн зөвлөлийн анхдугаар хуралдааныг ирэх зургаадугаар сард Баян-Өлгий аймагт зохион байгуулж, баруун бүсийн 2040 он хүртэлх хөгжлийн ерөнхий төлөвлөгөөг хамтдаа хэлэлцэхээр төлөвлөсөн гэлээ.
