Монгол Улсын аялал жуулчлалын сонирхолтой арга хэмжээний нэг болох бүргэдийн баяр Богдхан уулын Жаргалантын ам дахь "Чингис Хааны Хүрээ" аялал жуулчлалын цогцолборт эхэллээ.
Үндэстний цөөнх болсон казах түмний бүргэдээр ан хийх уламжлал, зан заншлыг сэргээх, хойч үеийнхэнд өвлүүлэн үлдээх, дотоод болон гадаадын жуулчдад сурталчлах, аялал жуулчлалын бүтээгдэхүүн болгоход чиглэгдсэн уг баяр тэмцээн хэлбэрээр явагддаг бөгөөд бүргэдчид үндэсний хувцсаараа гоёж, гаршуулсан бүргэдээ гарын шуун дээр суулгаж, бүргэдээр ан хийхэд сургасан морио унаж баярын жагсаалд нэгдсэнээр тус эвент эхэлдэг.
Бүргэд гэх анч, сүрлэг шувуугаар овоглсон эвент, арга хэмжээ олон аймаг, орон нутагт өөр өөрийн өнгө төрхтэй зохион байгуулагддаг ч Нийслэлийн Аялал жуулчлалын газраас зохион байгуулдаг хаврын энэхүү эвентэд хамгийн олон хүн оролцож, жуулчид олноор зорьж ирдгээрээ өргөн дэлгэр болдог юм.
Жуулчны улирлыг уртасгах, өв соёлыг олон нийтэд түгээх зорилгоор жил бүрийн гуравдугаар сарын эхний долоон хоногийн амралтын өдрүүдэд болдог энэхүү Бүргэдийн баяр энэ жил 19 дэх удаагаа эхэлж байна. Өнөөдөр, маргааш хоёр өдрийг гэр бүл, найз нөхөд, хамт олонтойгоо байгалийн сайхан, цэвэр агаарт зугаалангаа сонирхолтой баярт саатаарай.
Бүргэдээр ан хийх уламжлалт зан үйлийг 2010 онд ЮНЕСКО-ийн “Хүн төрөлхтний соёлын биет бус өв”-д албан ёсоор бүртгэжээ.
