Талуудын удаа дараагийн яриа хэлэлцээний үр дүнд мухар төмөр зам буюу Гашуун сухайт-Ганц модны боомт чиглэлийн төмөр замыг холбохоор, экспортыг нэмэгдүүлэхээр болсон. Ерөнхий сайд Л.Оюун-Эрдэнэ өнгөрсөн сард БНХАУ-д айлчлахдаа 14 жил гацсан энэ төслийг хөдөлгөхийг өмнөд хөршөөр зөвшөөрүүлж чадсан. Хэрэв энэ төмөр зам гацаанд ороогүй бол Монгол Улс нүүрсний экспортоос 19 тэрбум ам.доллар олох боломжтой байсныг Уул уурхайн яамны шинжээчид тогтоосон. Хятадын тал ч төсөл гацсанаас 14 тэрбум юанийн алдагдал хүлээсэн болохоо албан захидлаар мэдэгдчихсан. Монголын экспортын түүхэнд хар толбо болсон энэ ажиллагаа эх орончийн дүр эсгэсэн улстөрчдөөр дамжсан нь хамгийн гунигтай.
Хоёр дахь Замын-Үүд буюу Гашуун сухайтын төмөр замын холболтын асуудлыг тун удахгүй УИХ-аар хэлэлцэхтэй холбоотойгоор улс төрд хөдөлгөөн ороод эхэлжээ. Хөгжлийн боломжийг хулгайлж, хувийн эрх ашгаа ямагт нэгд эрэмбэлдэг бүлэглэлийнхэн сурсан зангаараа "Засгийн газрыг огцруулъя", "Ерөнхий сайдыг унагаая", улсын төсвийг бойкотолъё гэх зэргээр Монголыг дотроос нь хагалах хорт явуулгаа хэдийнэ эхэлчихсэн байна. Төмөр замын гацаа арилж, улсын экспортын орлого нэмэгдэх болоход улс төр, эдийн засгийн бүлэглэлүүд яагаад ингэтлээ уурсаад байгаа юм бол?
Хэргийн учиг эндээс эхтэй бололтой . 2014 оны гуравдугаар сарын 21-нд Засгийн газрын хуралдаанаар нүүрсний экспортыг нэмэгдүүлэх, гадаад худалдааны тэнцвэрийг сайжруулах бодлогын хүрээнд Гашуунсухайт-Ганцмод боомтуудыг холбосон төмөр замыг барьж, ашиглах чиг үүрэгтэй “Гашуунсухайт төмөр зам” ХХК-ийг байгуулахаар шийдсэн байдаг. Хамтарсан компанийн 51 хувийг “Эрдэнэс Тавантолгой” ХК, “Энержи ресурс” ХХК, “Тавантолгой” ХК, 49 хувийг “Шиньхуа” компани эзэмшихээр болсон. Хамтарсан компанийн гүйцэтгэх захирлаар Х.Ганболд томилогдсон. Хуулийнхан Х.Ганболдыг эртнээс хараандаа авч, шалгаад эхэлжээ.
Монголын нүүрсийг хэдхэн гэр бүл захирч, эзэн суух гэсэн хэргийн мөрөөр хуулийнхан орчихсон учраас бүлэглэлийнхэн их, багагүй сандралдаад байгаа юм байна. Чаддагаараа засаг руу ноцож, төрийг дотроос нь бужигнуулах санаархал ид цагаан цухалзах болов. Хамтарсан Засгийн газар ажиллаж байх үед дотоодын улс төрийн тэмцэл намждаг. Харин бүлэглэлүүдийн ашиг сонирхол хөндөгдөхөд үүрээ эвдүүлсэн шоргоолж шиг бужигнаж, зөв байр суурин дээр байгаа Ерөнхий сайд, Засгийн газраараа туг тахидаг хараалыг хариулах цаг болжээ. Тэгэхгүй бол том төслүүдийн үр өгөөж иргэн бүрд очихгүй хэдхэн компанийн халаас руу урссан хэвээрээ л үлдэнэ.
