УИХ 76 гишүүнтэй байсныг 126 болгох өөрчлөлтийг Үндсэн хуульд оруулж, түүнээс хойш сонгогдсон анхных парламент бүрэн эрхээ хэрэгжүүлж байна. Мордохын хазгай гэдэг шиг энэ УИХ-ын бүтэлгүйтэл төсвийн тогтворгүй байдалд хүргэж, сүүлдээ төрийн институц хоорондын зөрчил болж даамжрах тал руугаа явж байна. Гишүүн С.Ганбаатар Ерөнхийлөгч хумсаа нуусан муур шиг чимээгүй харж сууж байснаа төсөвт хориг тавилаа гэж чуулган танхимд омогдов. Тав сонгогдсон С.Бямбацогт гишүүн парламентын 34 жилийн түүхэнд ийм ичгэвтэр байдалд орж байсангүй хэмээн шүүрс алдав. Мянга ингэж матрын нулимс унагавч УИХ хууль дээдлэх Үндсэн хуулийн суурь зарчмыг зөрчсөн учраас Ерөнхийлөгч хориг тавьсан нь бултах аргагүй үнэн. Хулгай гарчээ гэтэл юун гуя гэсэн гэдэг шиг гишүүд одоо Засгийн газар, Ерөнхийлөгч хоёрыг буруутган муучлаад яах вэ дээ. Ерөнхийлөгч УИХ-ын шийдвэрт хориг тавьсан болохоос Монгол Улсыг төсөвгүй гац гэж хүсээгүй нь тодорхой.
Ер нь Монголын улс төрийг бужигнуулах, ирэх жилүүдэд хэрэгжүүлэх 14 мега төслийг дахин гацаах сонирхол хүчтэй байна гэдгийг сүүлийн өдрүүдэд өрнөж буй үйл явдлууд бэлхнээ харуулж байх шиг. Хамгийн эхлээд Монгол Улсыг төсөвгүй болгох акц УИХ дотроос эхэлж, олон нийтэд амар хялбар аргаар танигдах гэсэн гишүүд үүнд ашиглагдав. Араас нь МҮХАҮТ-ын ерөнхийлөгчийн сонгуулийг будлиантуулах асар том хуйвалдаан болж өнгөрлөө. Бизнесийнхний хэлж буйгаар Танхимын ерөнхийлөгчөөр сонгогдсон Л.Төр-Одын ард оросуудын ашиг сонирхол байж магадгүй гэнэ. Элдвийн л яриа гарч. Л.Төр-Од нь Ерөнхийлөгч асан Н.Энхбаярын бойжуулсан бүтээгдэхүүн гэдгийг хэвлэлүүд мэдээлсэн байна лээ. Н.Энхбаяр бол насаараа албан тушаалд шунасан, 2024 оны сонгуулийн дараа хамтарсан Засгийн газар байгуулна гэхэд дэлбэртлээ уурласан, одоо ч уурласаар байгаа нэгэн.
Ерөнхий сайд Л.Оюун-Эрдэнэ саяхан өмнөд хөршид айлчлахдаа олон жил гацсан экспортын төмөр замыг урагшлуулж, Гашуунсухайт-Ганцмод боомтын хил холболтын хэлэлцээрийг эцэслэсэн. Ингэхдээ ямар нэг дундын зууч буюу дундаас нь ашиг хонжоо хайгчгүйгээр ажил урагшлуулах тохирлцоо хийсэн. Анх 2003 онд л Засгийн газар хоорондын зуучгүй гэрээ хийчих боломж үүсчихсэн ч дунд нь заавал эрх ашиг, сонирхол оруулах гэсэн бүлэглэлээс болоод гацаа үүссэн байдаг. Хоёр улсын Засгийн газар хийчих гэрээний дунд нь зуучлагч орчихсон хэрэг. Өнгөрсөн он жилүүдэд одоо яригдаж байгаа Гашуунсухайт-Ганцмод боомтын төмөр зам, Тавантолгойн ордыг ашиглах Монгол, Хятадын хэлэлцээрийн дунд нэг компани явсан, УИХ-ын гишүүн Д.Энхтүвшин тэр зуучлагч компанийн Дэд ерөнхийлөгчөөр нь 1997-2022 онд ажилласныг "Өдрийн сонин"-д дурдсан байна лээ.
Том төслүүдийн гацаа арилж, гарааанаас хөдөлмөгц улс төр, эдийн засгийн бүлэглэлүүд ч зэрэгцээд хөдөлж эхэлж байна. Нэг хэсэг нь бизнесийн явцуу эрх ашгаараа асуудалд хандаж, нөгөө хэсэг нь албан тушаалын шуналаа барьж дийлэхгүй, зарим нь гадаадын улс орны эрх ашгийг гүйцэлдүүлэх гэсэн хорлонтой санаа тээж явахыг ч үгүйсгэх арга алга. Нэг хэсэг олигархууд биш монголчууд нийтээрээ сайхан амьдаръя, орлоготой болъё гэхээр хаанаас ч юм гацаагчид гарч ирээд улсын улс төр, эдийн засгийг түүхийг давтаж хэрхэвч болохгүй. Төрийг бужигнуулж байгаад төслүүдийг гацаадаг танил технологи бол Монгол Улсын хөгжлөөс хамгийн багадаа нэгэн арваныг хулгайлж, хохироодгийг тарчиг амьдрал бидэнд хангалттай нотолсон.
