Үйлдвэрийн орлогч дарга Т.Батмөнх Лексус-570 машиныг 16 сая төгрөгөөр хувьдаа авсан, удирдлагууд нь Арабын нэгдсэн Эмират улсын Дубай хотод ажиллаж ирэхдээ 240 сая ам.доллар буюу 683 тэрбум гаруй төгрөгийн зээл авахаар тохирсон гэх дуулиан хэвлэлээр дэгдээд байна. Эрдэнэт үйлдвэр одоо 100 хувь Монголынх, төрийн өмчит үйлдвэрийн газрын статустай. Өмнө нь "Жаст"-ын гэгддэг Ш.Батхүү нар Эрдэнэт үйлдвэрийн Монголын талын 51 хувийг барьцаалж асар их хэмжээний зээл хуурамч бичиг баримтаар авчихаад тавиад туучихаа шахсан гашуун түүх саяхных. Энэ хэрэг явдал одоо ч эцэслэн шийдэгдээгүй байгаа. Адаг сүүлд нь тавьсан өрийг нь үйлдвэрийн Эрсдэлийн сангаас 40 сая ам.доллар төлж дуулиан шуугианыг намжаасан байдаг. Энэ өрийг төлөөгүй бол юун 49 хувийн дотоод маргаан, үйлдвэрээ тэр чигээр нь алдахад ойрхон байсан. Ийм гашуун сургамж давтагдах гэж байгаа юм биш биз.
Уулын баяжуулах Эрдэнэт үйлдвэрийг монголчуудын "саалийн үнээ" гэдэг байлаа. Тэгэхдээ үйлдвэрийн 49 хувийг оросууд эзэмшдэг байхад ийм үг гарсан юм. Одоо бол хэл амтай ч гэсэн 49 хувиа оросуудаас авч монголчууд өөрсдөө эзэмших болсон. 20-р зууны манлай бүтээн байгуулалт болсон Эрдэнэт үйлдвэр 21-р зуунд бүтнээрээ Монгол Улсын өмч болсон нь яаж ч харлуулсан гавьяатай үйл хэрэг байв. Тэрний хүчээр цар тахлын үед Монгол Улсын бүх албан газар, айл өрхүүд цахилгаан, дулаан, хог, усны мөнгөө Эрдэнэт үйлдвэрээр даалгаж, эдийн засгийн дарамтаас багахан ч гэсэн чөлөөлөгдөж байгаа. Эрдэнэт үйлдвэрийн Монгол Улсын эдийн засагт оруулсан хувь нэмэр асар их, үүнтэй маргах зүйлгүй. Ерөнхийлөгч зарлиг гаргаж Монгол Улсын баатар цол олгосон нь гавьяаг нь үнэлсэн хэрэг.
Ардын дайсан болтлоо балбуулсан Аж үйлдвэрийн сайд асан Д.Эрдэнэбат нар Эрдэнэт үйлдвэрийн оросуудын мэдэлд байсан 49 хувийг Монголдоо авчраагүй бол айл гэр болгон цахилгаан, дулаанынхаа мөнгийг даалгах байсан болов уу. Сахил хүртээд шал дордов гэдэг шиг Эрдэнэт үйлдвэр 100 хувь төрийн өмч болсон хэрнээ улстөрчдийн шахаа, жижиг приусын үнээр бандгар жийп авдаг цавчаа арилж өгөхгүй байгаа нь харамсалтай. Авсан саалийнхаа тэн хагасыг айлд өгдөг байсан үйлдвэр өнөөдөр бүтнээрээ улсын мэдэлд ирсэн цаг үе шүү дээ. 49 хувийг авчирсан хүмүүсийг шоронд хийж алдар хүндийг нь шороотой хутгаж шоглочихоод ард нь иймэрхүү будлиан хутгадаг цөөн хэдэн дарга нар дураараа дургиж болно гэж үү.
Ерөөс энэ үйлдвэр төрийн мэдэлд байгаа цагт цавчаа шахаа тасрахгүй нь тодорхой байна. Тал өмч нь оросуудад байхдаа ч, одоо бүтэн болсон ч дарга нарынх нь балагтай явдлууд тасарсангүй. Тиймээс уул уурхайн баялгийг иргэн бүрд тэгш, шударга хүртээх үүднээс Эрдэнэт үйлдвэрийн хувьцааг монгол хүн бүрд эзэмшүүлье.
