Тажикстаны Душанбе хотод үргэлжилж буй жүдо бөхийн “Их дуулга” тэмцээнд 65 орны 400 гаруй жүдоч хүч үзэж буй. Тус тэмцээний эхний өдөр манай улсаас долоон тамирчин татамид гарснаас олон улсын хэмжээний мастер Б.Баасанхүү алт, гавьяат тамирчин Л.Энхрийлэн хүрэл медаль хүртлээ.
Тодруулбал, эмэгтэйчүүдийн 48 кг-ын жинд Б.Баасанхүү Мальт, Хятад, Испани, Словен, Туркийн бөхчүүдийг буулган авснаар “Их дуулга” ангиллын тэмцээнд анх удаа түрүүлэв. Тэрээр уг тэмцээнээс өмнө Азийн аварга болон насанд хүрэгчдийн улсын аваргад дараалан түрүүлээд байсан юм. Тэгвэл гавьяат тамирчин Л.Энхрийлэн Узбекистан, Герман, Хорватын хүчтэй өрсөлдөгчийг ялсан ч дэлхийн аварга Канадын Жессика Климкайтад тахим буулгав. Улмаар хүрэл медалийн төлөөх барилдаанд Бельгийн Либээрийг хожсоноор хүрэл медальийн тавцанд зогслоо. Энэ нь Л.Энхрийлэнгийн “Их дуулга” ангиллын тэмцээнээс авч буй тав дахь медаль юм.
