БНЭУ-ын Мумбай хотод энэ сарын 24-26-нд ой тогтоолтын Олон улсын холбооноос зохион байгуулсан Ой тогтоолтын Дэлхийн аварга шалгаруулах тэмцээнд Монгол, Герман, Норвеги, Дани, Япон, Энэтхэг зэрэг 13 орны 780 тамирчид 3 өдрийн турш харааны болон сонсголын ой тогтоолтыг шалгасан 10 төрлөөр өрсөлдөж шилдгүүдээ тодрууллаа.
Манай улсыг төлөөлөн 12 тамирчин олон улсын шүүгч, дасгалжуулагч Б.Баасандорж, Ө.Сэнгэсамдан нарын хамт амжилттай оролцон нийт 90 медалиас 23 алт, 16 мөнгө, 8 хүрэл буюу нийт 47 медаль, 7 цомын эзэд болж багаараа үнэмлэхүй ялалт байгуулжээ. Улсаа төлөөлөн оролцсон Оюун ухааны академийн тамирчид багаараа дэлхийн 4 удаагийн аварга боллоо. Тус тэмцээний 10 төрлийн дараах нийлбэр оноогоор 2022 оны дэлхийн аварга, олон улсын Их мастер Т.Тэнүүн тэргүүлж дэлхийн хошой аварга боллоо.
