Монгол Улсыг “Хурлын бүгд найрамдах улс” боллоо гэсэн шүүмжлэл байдаг. Төрийн байгууллагууд элпдэв хурал, форум, семинар, сургалтаас сургалтын хооронд өдөр хоногийг өнгөрөөх болсон нь нууц биш. Төрийн байгууллагууд хурал, өдөрлөг зохион байгуулахаас бусдаар тухайн үйл ажиллагааны үр дүн ямар байхыг огт боддоггүй ажээ. Нийслэлийн соёл урлагийн байгууллагууд “Улаанбаатарын хаврын баяр-2023” нэгдсэн өдөрлөгийг зохион байгуулж, урлаг соёлын төрийн өмчит бүхий газруудыг өргөнөөр хамрууллаа. Тус өдөрлөгт СУИС, СИТИ дээд сургууль, Кино урлагийн дээд сургууль, Монголын үндэсний их сургууль, Монгол улсын Консерватор болон сургалтын төвүүд элсэлтийн мэдээлэл өгөх, хөтөлбөрөө танилцуулах элсэгчдэд чиглэсэн нээлттэй мэдээлэл өгөх танилцуулгыг бэлджээ.
Асар бүрд ширээ дэлгэж сургуулийн танилцуулга, урлагийн дугуйлангийн элсэлт, мэдээлэл хөтөлбөрийн дэлгэрэнгүй мэдээлэл, хэдэн оноог ямар хичээлээр өгч байж тус хөтөлбөрт хамрагдах мөн өөрсдийн багш нарын хэвлэсэн ном, гарын авлагыг дэлгэсэн байв. Тус үйл ажиллагаа нь ахлах ангиа төгсөөд мэргэжлээ сонгох сурагчдад чиглэсэн, тэдний мэдэхгүй ямар олон хөтөлбөр боломж байгааг мэдүүлэх зорилготой байжээ.
Гэвч энэ жил 12-р ангиа төгсөж мэргэжлээ сонгохоор бэлдэж, судалгаа хийж байгаа сурагчид, багш эцэг эхчүүдэд мэдээлэл огт өгөөгүй байх юм. Зорилтот хүмүүстээ зар хүргээгүй учраас хүмүүс юу болж байгааг төдийлөн ойлгоогүй, мэдээлэлгүй гайхсаар байв. Тус өдөрлөгт оролцож буй СУИС-ийн Соёлын сургуулийн багш Б.Алимаа “Соёлын сургууль нь үндсэн таван тэнхимтэй үүнээс гурав нь тэнхим зургаан хөтөлбөрөөр элсэлт авдаг. Соёлын маркетинг, менежмент, номын сан, соёл судлал, соёлын аялал жуулчлал, түүх музей судлал гэсэн монгол улсад эрэлттэй байгаа мэргэжлүүдээр элсэлт авч байна. Соёл урлагаар дамжуулж нийгмийн сэтгэлзүйг эрүүлжүүлэх урианы хүрээнд өдөрлөгт оролцож байгаадаа таатай байна. СУИС-ийг зөвхөн дуулдаг, жүжиглэдэг, хөгжимддөг гэж хүмүүс их төсөөлдөг гэтэл бусад өөр мэргэжлээр элсэлт авдаг талаар ойлголт бараг байхгүй. Иймээс ийм олон эрэлттэй мэргэжил байгаа шүү гэдгийг олон сурагч, эцэг эхчүүд мэдээсэй гэж хүсэж байна. Иймээс дараа жил Боловсролын яам, нийслэлийн соёл урлагийн газар, соёлын яам, нийслэлийн боловсролын газар, дүүргүүд хамтарч зохион байгуулах, зарыг зорилтод бүлгэд илүү түгээх ирэх нөхцөл боломжоор хангах зохион байгуулалтайгаар авч ирж танилцуулах шаардлагатай харагдаж байна гэсэн юм.
Жишээ дурдахад, СУИС-ийн Соёлын сургуульд “Номын сан судлал” гэсэн хөтөлбөр байдаг боловч сурагчид төдийлөн мэддэггүй. Мэдээлэл байхгүйгээс дөрвөн хүүхдийн квот байсан ч өнгөрсөн жил ганцхан оюутан сонгожээ. “Номын сан судлал” хөтөлбөр нь АНУ-ын Конгрессын номын санд дадлага хийх боломжтой нийгэмд боловсон хүчин дутагдалтай мэргэжил. Нийслэлээс төв талбайд зохион байгуулсан өдөрлөг үр дүнгээ өгсөн үгүйг хэлж мэдэхгүй байна. Төгсөх ангийн сурагчдад зориулсан мэт боловч тэдэндээ зориулагдаагүй, зар хүрээгүй ээлжит нэгэн өдөрлөг ямартай ч болоод өнгөрлөө.
Бэлтгэсэн: Г.Тунгалаг
