Ахмад настнууд өдрийн цагаар их унтах, нойрмоглох зэрэг нь альцгеймерийн өвчний урьдал нөхцөл байж болох юм гэж эрдэмтэд дүгнэжээ. Сан Францискогийн Калифорнийн их сургуулийн сэтгэцийн эмгэг судлалын туслах профессор доктор Юэ Ленг "Энэ нь хөгшрөлт хурдацтай явагдаж байгаагийн дохио байж магадгүй. Хэрэв та урьд нь унтдаггүй байсан бөгөөд өдөртөө илүү нойрмог болж байгаагаа анзаарсан бол танин мэдэхүйн эрүүл мэнд муудаж байна гэсэн үг" гэжээ. Эрдэмтэд дунджаар 81 настай 1000 гаруй хүнийг хэдэн жилийн турш ажигласан бөгөөд судалгаанд оролцогчид жил бүр танин мэдэхүйн чадвараа үнэлүүлэх сорилтод хамрагддаг байв. Танин мэдэхүйн хувьд сулралгүй оролцогчдын өдрийн цагаар унтах хугацаа жилд дунджаар 11 минутаар нэмэгдэж байсан бол бага зэргийн танин мэдэхүйн гажиг илэрсэн хүнд энэ хугацаа 24 минут байжээ Альцгеймэрийн өвчин оношлогдсоноос хойш жилд унтах хугацаа 68 минутаар нэмэгдсэн гэж "Alzheimer's dementia" сэтгүүлд нийтэлжээ.
Нас барсны дараах тархийг харьцуулж үзэхэд Альцгеймерийн өвчтэй хүмүүст сэрүүн байдлыг дэмждэг тусгай мэдрэлийн эсүүд цөөн байдаг нь тогтоогдсон байна.
Иймээс өдрийн цагаар нойрмоглох нь улам бүр нэмэгдэж байгаа бол тархинд өөрчлөлт орж байгаагийн анхны шинж тэмдэг гэж үзэх боломжтой гэж судалгаагаар дүгнэжээ.
