Өнгөрсөн пүрэв гарагт Шинжааны Өрөмч хотын барилгад гал гарч 10 хүн амиа алдсантай холбоотойгоор Хятадын олон хотод "Тэг ковид" бодлогыг эсэргүүцсэн давалгаа эхлээд байна. Гурван сар гаруйн турш хорионд байсан хүмүүс галын аюулд хөл хориог буруутгаж байгаа юм. Бямба, ням гарагт Бээжин, Шанхай, Чэнду болон Хятадын бусад томоохон хотууд, мөн олон арван их сургуулийн хотхонд хохирогчдод эмгэнэл илэрхийлэх, хөл хорио, ковидын эсрэг хатуу бодлогыг эсэргүүцэх цуглаан зохион байгуулжээ. Олон арван жилийн турш гаргасан дүрэм журмыг үг дуугүй дагадаг байсан иргэдийнхээ дуулгаваргүй байдлын эсрэг Бээжин арга хэмжээ авч эхэлсэн ба цагдаа нар эсэргүүцлийн жагсаалыг зогсоохын тулд ажиллаж байна.
Шанхай хотод сүүлийн хоёр шөнө эсэргүүцэгчид цугларсан гудамжийг эрх баригчид хаасан бол Бээжингийн төв метроны буудлын эргэн тойронд хэдэн арван цагдаагийн машин эгнэж, эргэн тойрон дахь хорооллуудад эргүүл хийж байхад энгийн болон дүрэмт хувцастай офицерууд буудлын гарц дээр зогсож, хүмүүсийг байцааж байгаа ажээ.
Ням гарагт томоохон эсэргүүцлийн жагсаал болсон Бээжингийн элит Цинхуа их сургуулийн удирдлагууд тахлын эсрэг оюутнуудын симпозиум зарлаж, оюутнуудыг амралтаараа гэртээ эрт харихад нь туслахаар үнэ төлбөргүй автобус гаргасан байна. Хичээлийн амралтын хугацаа нь хараахан дуусаагүй байгаа тул оюутнууд уг арга хэмжээг гайхан хүлээн авчээ. Сургууль хүсэл тэмүүлэлтэй залуусыг асуудалд оруулахааас сэрэмжилсэн үйлдэл гэж үүнийг зарим нь үзэж байгаа бол Бээжин оюутны хөдөлгөөнөөс айж байна зарим нь дүгнэж байна.
Жагсагчид хөл хорио цээрийн дэглэмийг зогсоохыг шаардсан бол зарим нь, ардчиллыг тогтоож, Ши Жинпиний засаглалыг зогсоохыг уриалсан юм . Шанхай хотын Шүхуй дүүргийн Вүюань замд цугларсан олныг харуулсан видео бичлэгт хүмүүс "Бид худал хуурмаг биш, хүндэтгэлийг хүсч байна." Бид соёлын хувьсгалыг биш шинэчлэлийг хүсч байна. Бид удирдагч биш санал авахыг хүсч байна. Бид боол биш иргэн байхыг хүсч байна” гэсэн бичиг барьсан байжээ.