Хотын төвөөр дугуйн зам тавина гэдэг Мянгуужингийн үлгэр болоод дуусаж байна. Өнгөрсөн тавдугаар сард нийслэлийн удирдлагууд энэ жил зургаан байршилд нийт 16 километр дугуйн зам тавина гэж мэдэгдэж, маршрутуудыг нь зарласан. Хагас жилийн дараа харахад нүдэнд харагдаж, гарт баригдах дугуйн зам алга. Харин явган хүний зам дээр дугуйн замын тэмдэглэгээ хийчихсэн газрууд бол цөөнгүй байна. Тухайлбал Боловсролын их сургуулиас Зүүн дөрвөн зам орох замд ийм хачин гаж зүйлтэй тааралдана. Боловсролын их сургуулийн замын хойт талын автобусны буудлаас Арслантай гүүр явах явган хүний замыг цагаан хүрээ татаж тэмдэглэгээ хийгээд дугуйн зам болгочихож. Одоо түүгээр явган хүн явах ёсгүй л гэсэн үг. Арслантай гүүрээс зүүн тийш Бөхийн өргөө орох замын урд талаар энэ байдал мөн үргэлжилнэ.
Явган хүний замыг будаж, тэмдэглэгээ хийгээд л дугуйн зам. Ийнхүү “Зэрэг нэмэхийн өмнө” киноны тал еэвэнгийн онигоо шиг л юм болж.
Одоо удахгүй хэн нэг дарга гарч ирээд “Энэ жил төдөн тэрбумаар төдөн км дугуйн зам тавилаа” гээд хөөс сахруулаад ярьж мэднэ. Гэтэл амьдрал дээр ийм хөгийн, шогийн арга хэрэглэжээ. Нэгэнт тэмдэглэгээг нь хийгээд өгчихсөн болохоор унадаг дугуйтай хүмүүс уг замаар нь давхиж таарна. Гэтэл явган зорчигчид мөн үүгээр зорчино. Ингээд авто машинд шүргүүлж гэмтэхээс илүүтэй дугуйтай хүнд дайруулж гэмтэх тохиолдол нэмэгдэнэ. Явган хүний замаа илүү өргөтгөж, зорчих хэсгийг нь хааж тагласан барилга байгууламж, хашаа хайсыг зайлуулж чөлөөлөх замаар, эсвэл бүр цоо шинээр трасс татаж байж унадаг дугуйн зам тавихаас бус ингэж нүглийн нүдийг гурилаар хуураад яах юм бэ.
Уг нь нийслэлчүүд унадаг дугуй хэрэглэх нь эрс нэмэгдсэн. Энэ бол том хотуудад байдаг сайн жишиг. Түгжрэлийг бууруулах нэг хүчин зүйл. Авто замын ачааллыг бууруулах 21 стратегийн боловсруулсан АНУ-ын эрдэмтэн Дэвид Левинсон явганаар болон унадаг дугуйгаар зорчих нь олон талын үр ашигтай гэдгийг онцолсон байдаг юм билээ. Засгийн газраас ч унадаг дугуйн хэрэглээг дэмжих бодлого баримталж байгаа гэж болно. Өнгөрсөн наймдугаар сард байгуулагдсан Хот хөдөөгийн хөгжлийн тэнцвэрийг хангах, төвлөрлийг сааруулах, автозамын түгжрэлийг бууруулах үндэсний хорооны анхны хурал дээр Ерөнхий сайд Л.Оюун-Эрдэнэ “Дугуйгаар зорчих, алхах боломжтой хувилбарыг дэмжсэн ямар шийдэл байж болох вэ гэдгийг судлах үүрэг өгсөн. Түүнээс ч өмнө нийслэлийн хэмжээнд дугуйн замыг олон чиглэлд тавина гэж рекламдсан. Хийж байгаа ажил нь харин ацаг шүдний зөрүү шиг байна. Уг нь агаарын дүүжин такси гэх мэт агаарын юм ярьсны оронд дугуйн зам тавьж түгжрэлийг бууруулна гэж ярих нь илүү бодитой. Гэтэл явган хүний замаа дугуйн зам болгож тэмдэглэгээ тавьчихаад суугаад байх юм бол энэ ажил үлгэр болно. Нөгөө талаар унадаг дугуйн зам тавина, тавьж байна, тавьчихлаа гэж рекламдаад цаана нь өндөр төсөв батлуулж, мөнгө угааж байгаа юм биш биз гэх хардлага ч төрж байна.
Юутай ч 2021 онд нийслэлийн төсвийн хөрөнгөөр зургаан байршилд 16.34 км дугуйн зам тавьж байна хэмээн тавдугаар сарын 27-нд мэдээлжээ. Эдгээр дугуйн замын ажлын гүйцэтгэгчээр “Драгон бридж” ХХК, МАЗ ХХК-ийн түншлэл ажиллаж, Нийслэлийн Авто замын хөгжлийн газар хянаж байгаа гэсэн мэдээллийг тухайн үед хэвлэлээр түгээж байсан аж.
Дугуйн зам тавьж байгаа байршил нь:
-Чингэлтэй дүүрэг, Самбуугийн гудамж, Гэсэр сүмийн уулзвараас Анкарагийн гудамж хүртэлх 0.77 км дугуйн зам
-Баянзүрх дүүрэг, Энхтайваны өргөн чөлөө, МУБИС-ийн урд уулзвараас Зүүн 4 замын уулзвар хүртэл 1.5 км дугуйн зам
-Баянзүрх дүүрэг, Энхтайваны өргөн чөлөө, Зүүн дөрвөн замын уулзвараас Офицеруудын ордон хүртэлх 2.57 км дугуйн зам
-Баянзүрх дүүрэг Маршалын гүүрнээс Зайсангийн гүүр хүртэлх Туул голын арын далан дагуу 2.35 км дугуйн зам
-Сонгинохайрхан дүүрэг Таван шарын автобусны буудлаас 10 дугаар хорооллын уулзвар хүртэлх 4.45 км дугуйн зам
-Сонгинохайрхан дүүрэг Саппорогийн уулзвараас Баянбүрдийн тойрог хүртэлх 4.7 км дугуйн зам /Ард Аюушийн өргөн чөлөө, Л.Энэбишийн өргөн чөлөө/ юм.
