Хэнтий аймгийн “Өндөрхаан" нисэх онгоцны буудлыг шинэчлэн барих төслийн ажил эхэлжээ. Арабын эдийн засгийн хөгжлийн Кувейтын сангийн буцалтгүй тусламжийн хөрөнгөөр хэрэгжиж буй тус төслийн багц-1 барилгын тендерт "Барилга эрч" ХХК шалгарч, Зам, тээврийн хөгжлийн яамтай ажил гүйцэтгэх гэрээ байгуулаад байгаа юм байна. Барилга угсралтын ажлын хүрээнд нэг цагт 50 хүн хүлээн авах зорчигч үйлчилгээний терминал, бусад техникийн барилгууд баригдаж, 2023 оны дөрөвдүгээр сард ашиглалтад оруулах юм байна. Ийнхүү Чингис хааны өлгий нутагт гадаад, дотоодын аялагч, жуулчдыг татах дэд бүтцийн томоохон бүтээн байгуулалт эхэлжээ. Хэнтий аймагт түүхэн аялал жуулчлалыг хөгжүүлэх зорилго, хөтөлбөрийн хүрээнд аймгийн төвийн "Өндөрхаан" нисэх буудлыг шинэчлэн барихаас гадна Дадал суманд "Дэлүүн болдог" нисэх онгоцны буудал барих юм.
