Шойгу хүн амыг нүүлгэн шилжүүлэхийн тулд Оросын зэвсэгт хүчний довтолгоог зориудаар удаашруулж байна хэмээн мэдэгдэв.
Тэрбээр энэ тухай мягмар гарагт буюу 5-р сарын 24-нд мэдэгдсэнийг РИА Новости мэдээлэв.
Сайдын хэлснээр, Оросын Зэвсэгт хүчин эргэн тойронд байгаа суурингуудаас энгийн иргэдийг гаргах хүмүүнлэгийн коридор үүсгэж, чимээгүй дэглэм зарлаж байгаа аж.
"Мэдээжийн хэрэг, энэ нь довтолгооны хурдыг удаашруулж байгаа ч энгийн иргэдийг хохироохгүйн тулд үүнийг санаатайгаар хийж байгаа" гэж тэр тайлбарласан байна.
Оросын цэргүүд иргэний дэд бүтцэд цохилт өгөхгүй, үүнээс болж жирийн оршин суугчид хохирч магадгүй гэж Шойгу мөн онцолжээ. Үүний оронд Украины Зэвсэгт хүчний тодорхойлсон галын байрлал, цэргийн байгууламжуудад өндөр нарийвчлалтай зэвсгээр цохилт өгч байна гэж Батлан хамгаалах яамны тэргүүн мэдэгдэв.
Өнгөрсөн тавдугаар сарын эхээр Аюулгүйн зөвлөлийн нарийн бичгийн дарга Николай Патрушев Украинд явуулж буй цэргийн тусгай ажиллагаанд Орос тодорхой хугацаа дурдахгүй гэж мэдэгдэж байв.
Эх сурвалж: Лента.ру
