Туурга тусгаар Монгол Улс НҮБ-ын индэр дээрээс байгаль дэлхийгээ хамгаалах, цөлжилтийг бууруулах чиглэлээр манлайлал үзүүлж Тэрбум мод тарвж ургуулах амлалт авсан нь саяхан. Ерөнхийлөгч У.Хүрэлсүх төрийн тэргүүнээр сонгогдсоныхоо дараа "Тэрбум мод" үндэсний хөдөлгөөн өрнүүлж, эх орны өнцөг булан бүрд Монголоо ногооруулах ажил өрнөж эхэлсэн. Харин цэнхэр дэлхийгээ хайрлах энэхүү хөдөлгөөнийг дэлхий үнэлж эхэллээ. Үнэлээд зогсохгүй дэлхийн улс орнуудын удирдагчид Монголд чуулж, ногоон хөгжлийн асуудлаар нүүр нүүрээ харан ярилцахаар болсон байна.
Ерөнхийлөгч У.Хүрэлсүхийн санаачилгаар Цөлжилттэй тэмцэх тухай НҮБ-ын суурь конвенцын оролцогч талуудын 17 дугаар бага хурлыг Монгол Улсад зохион байгуулахаар болжээ. Конвенцид нэгдсэн улсууд Монгол Улсын гаргаж буй манлайлал, идэвх чармайлтыг бататган, тогтвортой хөгжлийн үндсэн тулгуур болох байгаль орчны асуудлуудаар ажиллаж ирсэн нэр хүндийг онцгойлон хүндэтгэж, 2026 онд зохион байгуулагдах 17 дугаар бага хурал (COP17)-ыг зохион байгуулах эрхийг ийн дэмжин баталжээ.
Цөлжилттэй тэмцэх олон улсын хүчин чармайлтын гол индэр болох томоохон хурлыг Монголд зохион байгуулснаар манай улсад нүүрлээд буй шар шороон шуургыг сааруулах, давтамжийг нь бууруулахад түлхэц үзүүлэх, “Тэрбум мод” үндэсний хөдөлгөөнийг амжилттай хэрэгжүүлэх, цар хүрээг нь өргөжүүлэх, олон улсаас дэмжлэг, хөрөнгө оруулалт татах таатай сайхан боломж бүрдэнэ. Ерөнхийлөгч У.Хүрэлсүхийн санаачилсан "Тэрбум мод" үндэсний хөдөлгөөн ийнхүү дэлхий нийтийн үйл хэрэг болж өргөжлөө.
