Монгол Улсын үе үеийн Ерөнхий сайд нарыг өнөөгийн Ерөнхий сайд Л.Оюун-Эрдэнэ өчигдөр хүлээн авч уулзсан билээ. Тус уулзалтад Монгол Улсын Ерөнхийлөгч, Ерөнхий сайд асан Н.Энхбаяр, Ц.Элбэгдорж, Ерөнхий сайд асан Ш.Гунгаадорж, М.Энхсайхан, М.Энхболд, С.Баяр, С.Батболд, Н.Алтанхуяг, Ж.Эрдэнэбат нар хүрэлцэн ирсэн байна.
Энэхүү уулзалтаар Засгийн газрын тэргүүнээр ажиллаж байсан эрхмүүд засаглаж байсан үеийнхээ нөхцөл байдал, нийгэм эдийн засагт тулгарч байсан асуудал, түүнийг шийдвэрлэхийн тулд хийж байсан ажил, гаргасан шийдвэр бодлогоо ярьжээ. Мөн үүнээс гадна Оюутолгойн ордтой холбоотой гэрээ, хэлэлцээр, инфляц гэх мэт цаг үеийн цөөнгүй асуудлаар санал солилцож, ярилцсан ажээ.
Мэдээж хэрэг энэхүү уулзалт ямар үр дүнтэй болсон, хэнд ямар сэтгэгдэл үлдээв гэдэг сонирхол татсан асуудал. Тэгвэл Ерөнхий сайд асан С.Баяр твитр хуудсандаа өөрт бодогдсон, уулзалтаас үлдсэн сэтгэгдлээ бичжээ. Тэрбээр, Уулзалтаас төрсөн бодол хэмээгээд "Төр засаг солигдож, төрсөн бие элэгдэвч Монголын цаг үргэлжилнэ. Хувийн гоморхолоо төрийн өсөрхөл мэт ярих хүн гарсангүй. Ашгүй даргын ажил ээлжтэй тул хоймор хатавчийн алинд ч суудаг хорвоо аж. Монголчууд бид цөөхөн учраас мөр мөрөө түшихээс өөр зам үгүй" гэсэн байна.
