Монгол хүний дундаж наслалтыг уртасгах, амьдралын чанарыг сайжруулах зорилгоор ЭМЯ-аас “Урьдчилан сэргийлэх, эрт илрүүлгийн үзлэг”-ийг энэ сарын нэгнээс улс орон даяар зэрэг эхлүүлсэн.
Орхон аймаг 106.9 мянган хүн амтай. Үүний 37422 нь 0-17 нас, 68673 нь 18-аас дээш насныхан байна. Эрүүл мэндийн урьдчилан сэргийлэх үзлэгт 0-5 насны 14097, 6-17 насны 23375 хүүхэд хамрагдана. Тэд ӨЭМТ-д амны хөндийн эрүүл ахуй, сүрьеэ, сэтгэц болон насны онцлогт нь тохирсон эрт илрүүлэг, үзлэгт хамрагдана. Орхон аймагт Өрхийн эрүүл мэндийн 8 төв байдаг юм.
Насан хүрэгчид БЗХӨ, В,С вирусын халдвар, сүрьеэ, зүрх судас, хоол боловсруулах эрхтэний эмгэг, чихрийн шижин, бамбайн эмгэг болон улаан хоолой, ходоод, умайн хүзүү, элэг, хөхний хавдар илрүүлэх шинжилгээнд хамрагдана. Тэд БОЭТ, Баян-Өндөр мед, Эрдэнэт Медикал, Эрдэнэт сувилал гэсэн эмнэлэгт үзлэг, оношилгоо, шинжилгээнд хамрагдана. Гэхдээ БОЭТ 18-30 насны иргэдийн үзлэгийг эхлүүлж байгаа бөгөөд учир нь Эрдэнэт медикал, Баян-Өндөр мед, Эрдэнэт сувиллын тусгай зөвшөөрөл, сонгон шалгаруулалт нь бүрэн шийдэгдээгүй байгаа тул насанд хүрэгчдийн 4 багцын эхнийхийг нь БОЭТ-д хамруулж байгаа ажээ.
Эрүүл мэндийн урьдчилан сэргийлэх үзлэг, оношилгоог эхлүүлсэнээр монгол эрэгтэй хүний дундаж наслалт 66.7 /2020он/ -оос 6 жилээр, эмэгтэйчүүдийн дундаж наслалт 76.2 /2020 он/ -оос 11.3 жилээр нэмэгдэх бодит үр дүн гарна гэж ЭМЯ тооцсон байна.
Орхон аймагт зонхилон тохиолдож буй өвчний нэгд, зүрх судас, хоёрт, БЗХӨ, гуравт, сүрьеэ, дөрөвт, элэг, ходоодны өвчлөл орж байна. Мөн хавдарын өвчлөлөөрөө 21 аймгаас дээгүүрт жагсдаг. Иймд эрүүл мэндийн даатгалд хамрагдсан бүх иргэнээ үзлэг, шинжилгээнд хамруулж дээр дурдагдсан өвчлөлийг бууруулаханд анхаарч ажиллах ажээ.
Монгол Улсын хэмжээнд ЭМД-д хамрагдсан 3 сая 68 мянган иргэн байгаа бөгөөд 230 мянга орчин иргэн даатгалд огт хамрагдаагүй байна.
