Төр засгийн шийдвэрт гомдох талархах асуудал чамгүй гардаг. Үүний нэг нь "Дарханы төмөрлөгийн үйлдвэр" болж байна. Өчигдөр тус үйлдвэрийг төрд авах шийдвэрийг Засгийн газраас гаргасан нь концессын гэрээгээр эзэмшигч талынхныг гомдоочих шиг боллоо. Тодруулбал, энэхүү шийдвэрийн талаар “Кью Эс Си” компанийн гүйцэтгэх захирал мэдээлэл хийсэн юм.
“Кью Эс Си” компанийн гүйцэтгэх захирал Э.Шижир:
-"Компанийн хувьд анх уул уурхайн металлургийн цогцолбор төсөл дээр хөрөнгө оруулах шаардлагатай гэсэн Олон улсын нээлттэй сонгон шалгаруулалтанд гадаадын компаниудтай өрсөлдөж, үндэсний цор ганц компани болж орсон. Дотооддоо ган бүтээгдэхүүн үйлдвэрлэх зорилгоор, эрсдэлтэй төслийг барьж авч, хэрэгжүүлж эхэлсэн бөгөөд 2013 оноос хоёр зорилго гарч ирсэн байгаа. Нэгдүгээрт, төмрийн хүдрийн орд газруудыг эдийн засгийн эргэлтэд оруулах төсөл төдийгүй хамгийн том орд нь Төмөртэйн орд байсан. Дэд бүтцийн төмөр зам, автозам болон цахилгаан дамжуулах агаарын шугамын ажлыг гэрээний хүрээнд хийх эрхийг нь ч олгосон. Олборлолт явуулах хүчин чадлыг бий болгох, техник эдийн засгийн үндэслэлийг батлуулах, баяжуулах үйлдвэрийг барих зэрэг цар хүрээ томтой төсөл л дөө. Нэгэнт эрхийг нь бидэнд өгсөн учир төслүүд ч амжилттай хэрэгжсэн.
Хоёрдугаарт, гангийн үйлдвэр барьж байгуулах байсан. Үүнийг хэрэгжүүлэхийн тулд дэд бүтцийн олон ажил хийх шаардлага гарсан. Судалгааны ажлууд ч хийгдсэн. Гэтэл уг төсөлд шаардлагатай цахилгаан эрчим хүчний эх үүсвэрийн төслүүд зогсонги байдалд орсноор төсөл цаашид явах боломжгүй болсон хэрэг. Тиймээс цахилгааны эх үүсвэрээ хэрхэн шйидэх вэ, цаашид хэрхэх вэ гэдэг дээр дүгнэлт хийх шаардлагатай байна. Бидний зүгээс хөрөнгө оруулалтын гэрээ байгуулагдсанаас хойш 12 жил, концессийн гэрээний хэлбэрт шилжсэнээс хойш найман жилийн хугацаанд Монгол Улсаа ган үйлдвэрлэгч болгох үйл хэрэгт үнэнч хэвээр ажилласаар байна.
Засгийн газрын хуралдаанаар манай компанид мэдэгдэл ирүүлээгүй байж шийдвэр гаргалаа. Төр, засгийнхаа гаргасан шийдвэр, олон нийтийн зүгээс ирж буй хүсэлтийг нь хүндэтгэн хүлцэл өчье. Гэрээний хүрээнд үүссэн нэг талын цуцлах хүсэлтийг цаашид эв зүйгээр шийдэх үүднээс тал талаасаа ажлын хэсэг байгуулан шийдвэрлэх хүсэлтэй байна. Ерөнхийдөө “Кью Эс Си” компанийн хийсэн ажлыг харлуулах үйл ажиллагаа явж байна. Төслийг хэрэгжүүлэх хугацаанд "Дарханы төмөрлөгийн үйлдвэр" 1.8 их наяд төгрөгийн орлоготой ажилласан. Ийм зэрэгт хүртэл хөгжүүлсэн. Энэ нь цэвэр ашиг биш, зөвхөн орлого бөгөөд дагасан зарлага ч гарсан юм шүү. Төмөрлөгийн үйлдвэр өмнөхөөсөө илүү сүүлийн хоёр жилд эерэг дүнтэй гарсан. Санхүү, хөрөнгө оруулалтын ажлыг ч хийж байгаа. Цаашдаа 1.5 их наядын хөрөнгө оруулалтаа хэрэгжүүлээд ард нь гарах боломжтой гэж үзэж байгаа" гэж тайлбарлалаа.
Анхлан гэрээ байгуулахдаа зургаан ажил гүйцэтгэнэ гэж заасан төдийгүй гэрээ байгуулахаас эхлээд л хууль зөрчсөн тухай мэдээлэл чих дэлсэж байгаа. Тэгвэл энэ талаар компанийн удирдлага "Хөрөнгө оруулагч шаардлагатай гэж үзээд төр засгийн зүгээс олон улсын уралдааныг зарласан. Үндэсний гэдэг утгаараа “Кью Эс Си” компани шалгаараагүй байх. Том төслийг хийж хэрэгжүүлэхэд Худалдаа хөгжлийн банк хамтарсан. Бид шалгараагүй байсан бол гадаадын өөр компани шалгарна. Хэн ч шалгарсан бай бас л цахилгааны эх үүсвэр нь гацаа үүсгэнэ. Төслийг хэрэгжүүлэхэд санхүүгийн тал дээр нь Худалдаа хөгжлийн банк дэмжлэг үзүүлж, оролцсон. Өнөөдрийг хүртэл хамтран хэрэгжүүлсээр байна. Нийт санхүүгийн 60 хувийг тус банк гаргасан бөгөөд 8.1 их наядын орлоготой холбоотой зардлууд гарсан байгаа. Тэгээд ч ашигтай ажилласан хэмээн хэлж болохгүй л дээ. Дарханы төмөрлөгийн үйлдвэрийн орлого 6 дахин, улсын төсөвт оруулах хөрөнгө нь 10 дахин нэмэгдэж, төмөр зам нь баригдсан байгаа" гэж хэллээ.
Цаашид тус үйлдвэрийн асуудлыг Засгийн газрын шийдвэрийн дагуу авах уу, эсвэл гэсэн асуулт үслээ. Магадгүй ажлын хэсэг байгуулах саналыг нь хүлээн авч, санхүүгийн тооцоо баримтыг тулгуурлан шийдвэрт хүрэх үү гэдэг үлдлээ. Тиймээс төмөрлөгийн үйлдвэрийн хувь заяа Засгийн газрын шийдвэр, хамтарсан ажлын хэсэг хоёрын хаашаа эргэх вэ гэдгийг харж суух л үлдэв.
