Сүүлийн 7 хоногийн хугацаанд БНХАУ-д цар тахлын 36 мянга 630 тохиолдол бүртгэгдэж, 1071 хүн амь насаа алдаад байна. Коронавируст халдварын тохиолдлын 60 орчим хувь буюу 21 мянган тохиолдол Хонконг -д бүртгэгджээ. Мөн Хятадын Жилин муж, Чанчун хотоос эхлэлтэй голомт эрчимтэй хүрээгээ тэлж Жилин муж даяар сүүлийн 7 хоногт 7119 тохиолдол бүртгэгдсэн байна. Жилин муж нь Хятадын Зүүн хойд бүсэд, ӨМӨЗО-той хил залгаа байдаг учир ӨМӨЗО-нд халдвар гарах эрсдэлтэй гэж үзэж болох юм.
Үүнээс гадна Шанхай хотод цар тахлын голомт идэвхтэй хэвээр байна. Сүүлийн 7 хоногт тус хотод 2308 тохиолдол бүртгэгджээ. БНХАУ нь нийт авто замын 82, төмөр замын 22 боомттой. Цар тахлаас шалтгаалж боомтын нөхцөл байдал амаргүй байдалтай болсон байна. Тухайлбал БНХАУ, ОХУ хилийн 18 боомттой. Үүнээс 5 боомт л ажиллаж байна. БНХАУ, Балба хилийн 4 боомттой ба 2 боомт хаагдсан. БНХАУ, Вьетнам хилийн 6 боомттойгоос 3 боомтын үйл ажиллагаа зогсжээ. БНХАУ, Лаос хилийн 5 боомттойгоос 3 боомт хаагдаж төмөр замын 1, авто замын 1 боомт ажиллаж байна.
Хятадын хуурай газрын боомтуудад халдвар хамгааллын маш хатуу дэглэм үйлчилж байгаа бөгөөд энэхүү дэглэмээс үүдэлтэй ачаа тээврийн саатал, боомтын үйл ажиллагааг зогсоох арга хэмжээ авч байгааг харж болно.
Н.Бат
