Олон улсад үүсэд буй цаг үеийн нөхцөл байдалтай холбоотойгоор өчигдөр болсон Засгийн газрын ээлжит хуралдаан дээр Ерөнхий сайд хэд хэдэн чиглэл өгчээ. Нэгдүгээрт, олон улсын нөхцөл байдал эмзэг байгаа энэ цаг үед гадаад бодлогын харилцаа, хамтын үйл ажиллагааг зөвхөн нэг цонхны бодлогоор буюу Гадаад харилцааны яамаар дамжуулан явуулах, хоёрдугаарт, үндэсний эв нэгдлийг эрхэмлэж, төрийн албан тушаалтан, алба хаагчид ямар нэгэн сэтгэл хөдлөлд автсан шийдвэр гаргахгүй байх, гуравдугаарт, эдийн засгийн шинэ сэргэлтийн бодлогын хэрэгжилтийг эрчимжүүлж, олон улсад шинээр үүсэж байгаа эдийн засгийн сөрөг нөлөөллийг бууруулах цогц арга хэмжээ боловсруулж Үндэсний аюулгүй байдлын зөвлөлд танилцуулахыг үүрэг, чиглэл болгожээ. Манай улс Украинаас өөрийн иргэдээ бүрэн татаж авсан бөгөөд дараагийн улсуудаас Монгол Улсын иргэдийг татан авах шинэ нөхцөл үүсэж магадгүй байгаа асуудлаар Засгийн газрын хуралдаанд мэдээлэл танилцуулжээ. Тиймээс энэ ажлын бэлтгэлийг хангахыг Гадаад харилцааны яаманд үүрэг болгосон байна.
Ташрамд тодруулахад, Монгол Улс Үндсэн хууль болон Гадаад бодлогын үзэл баримтлалын дагуу энхийг эрхэмлэсэн, нээлттэй, бие даасан, олон тулгуурт гадаад бодлого явуулдаг. Энэ зарчмын хүрээнд сүүлийн үед олон улсад өрнөж буй үйл явдлыг сэтгэл зовнин, анхааралтай ажиглаж байгаа бөгөөд хурцадмал байдал даамжирвал Европ болон дэлхийн энх тайван, тогтвортой байдалд ноцтой нөлөөлж, таамаглашгүй үр дүнд хүргэх аюултай тул холбогдох талууд яриа хэлэлцээний замаар, дипломат үйл ажиллагаа болон сайн санааны үндсэн дээр галыг даруй зогсоож хурцадмал байдлыг намжаах нь чухал байна гэдэг байр суурьтай байгаа гэдгийг Гадаад харилцааны сайд Б.Батцэцэг онцоллоо. Цаашид Үндэсний аюулгүй байдлын зөвлөлөөр Орос, Украины зэвсэгт мөргөлдөөнтэй холбоотой асуудлыг хэлэлцэж, шаардлагатай бол ойрын үед мэдэгдэл гаргахаар төлөвлөж байгаа ажээ.
