"Ус бол чандмань эрдэнэ" мөн үү гэвэл хүн бүр тийм гэнэ. "Усаа хэмнэе, хайрлая" гэвэл бүгд гараа өргөн дэмжих байх. Гэсэн ч амьдрал дээр энэн шиг худал үгс, худлаа хайр байхгүй гэвэл хилсдсэн болохгүй. Манай улсад өртөг зардлаасаа дор үнэлэгдэж үнэгүйдсэн зүйл бол УС. Улаанбаатар хотод ахуйн хэрэглээний цэвэр усны үнэ 1 литр нь 1 төгрөг 34 мөнгө орчим байгаа нь дэлхийн жишгээр бол толгойд багтамгүй маш хямд үнэ. Хүн хэрэглээнийхээ зүйлд мөнгө бага төлөх тусам түүнийг хайрлах сэдэл төрдөггүй нь бодит үнэн. 1 литр усыг 1-2 төгрөгөөр авч байгаа тул хүмүүс усны цоргоо хаахад яарахгүй. Тийм хүсэл сонирхол хүмүүст угаас төрөхгүй . Өнөөдөр 1 төгрөгөөр битгий хэл 1000төгрөгөөр ч авах зүйл дэлгүүрт алга болсныг бүгд мэднэ. Гэвч төрөөс барьсан иргэддээ ачаалал нэмэхээс эмээсэн хулчгар БОДЛОГО хүмүүст УСНЫ ҮНЭ ЦЭНийг байж болох хамгийн доод түвшинд хүргэж ойлгуулсаар удлаа.
УСУГ-ын Инженерийн бодлого, төлөвлөлтийн хэлтсийн дарга Н.Одхүүгээс усны үнэ тарифын талаар байр суурийг нь тодруулахад:
-"Усны өртөг маш хямд байгаа учраас хэрэглээ их замбараагүй байна. Жишээлбэл, авто угаалгын газар гэхэд ундны усаар автомашин угааж байгаа шүү дээ. Мөн зүлэг ногоо, зам талбайг ундны усаар усалж байна. Энэ бол өртөг бага байгаатай л холбоотой. Ахуйн хэрэглээний усны бөөний үнэ литр нь нэг төгрөг 34 мөнгө. Энэ бол дэлхийд байхгүй үнэ. Ийм бага өртөгтэй учраас хүмүүс тоолгүй, замбараагүй хэрэглэдэг. Цаашлаад усны өртөг бага учраас бид шугам сүлжээний ажлыг хурдан хийж чадахгүй байна. Манай байгууллага орлогоороо өөр өөрийгөө санхүүжүүлдэг. Тэгэхээр манайд орж ирж байгаа мөнгө нь бага учраас шугам сүлжээний ажлыг хийхэд санхүүгийн хувьд хүндрэлтэй байдаг. Тиймээс цаашид цэвэр, бохир усны өртгийг нэмэх шаардлагатай. Үүний тулд иргэд ухаалаг хэрэглээг нэвтрүүлж, усны хэрэглээ багатай аяга таваг угаагч, угаалгын машин, суултуур гэх мэт хувийн хэрэгцээний зүйлсийг ашиглавал зохистой. Энэ нь усыг алдагдалгүй, ухаалгаар зарцуулж буй нэг хэлбэр юм. Түүнээс биш бага ус хэрэглэ, усаа хэмнэ гээд байгаа зүйл биш. Мөн усны төлбөр бол үйлчилгээний өртөг. Түүнээс биш ус үнэгүй шүү дээ " гэв.
