Улаанбаатар хотын иргэдийн эрүүл, аюулгүй орчинд ажиллаж, амьдрах таатай нөхцөлийг бүрдүүлэх, байгаль экологийн тэнцлийг хангах чухал үүрэгтэй шинэ Төв цэвэрлэх байгууламж ашиглалтад орсоноор одоогийнхоос хоёр дахин их буюу хоногт 250 мянган шоо метр бохир ус цэвэрлэх хүчин чадалтай. 55 барилга, байгууламжаас бүрдэх бөгөөд Төв цэвэрлэх гарсан лагаа бүрэн боловсруулж, эрчим хүч үйлдвэрлэн дотоод хэрэглээнийхээ 35 хувийг хангах юм. Энэ нь жилд 7-8 тэрбум төгрөгийн эрчим хүч хэмнэнэ гэсэн үг юм.
Хоногт 250 мянган м³ хаягдал ус цэвэрлэх хүчин чадалтай шинэ Төв цэвэрлэх байгууламж нь Монгол Улсын Засгийн газраас “Улаанбаатар хотын төв цэвэрлэх байгууламжийн талаар авах арга хэмжээний тухай” 2017 оны 11 дүгээр сарын 15-ны өдрийн 311 тоот тогтоол гарсан бөгөөд “Улаанбаатар хотын төв цэвэрлэх байгууламжийг шинээр барих төсөл”-ийг баталж, санхүүжилтийн эх үүсвэрийг БНХАУ-ын Засгийн газраас Монгол Улсын Засгийн газарт олгох хөнгөлөлттэй зээлийн хүрээнд батлагдсан техник, эдийн засгийн үндэслэлийн дагуу барьж байгуулахаар шийдвэрлэсэн. Улмаар 2019 онд төслийн “Түлхүүр гардуулах нөхцөл”-тэй EPC гэрээ байгуулагдсанаар барилга угсралтын ажил эхэлсэн юм
Шинэ цэвэрлэх байгууламжид хаягдал ус хүлээн авах ажлыг 2025 оны 07 дугаар сарын 24-ний өдөр эхлүүлэн, 70,000 м3 усыг бохир усыг механик, физик, хими, нэмэлт биологийн цэвэрлэгээний аргаар технологийн дагуу боловсруулж, туршилтын горимоор ажиллаж байна. Одоогийн байдлаар хоногт 80,000-116,000 м3 бохир усыг цэвэрлэж байгаа бөгөөд зургадугаар сард багтаан төв цэвэрлэх байгууламжид ирж буй усыг 100% хүлээн авах нөхцөл бүрджээ. Шинэ цэвэрлэх байгууламж нь хоногт 250,000м3, жилд 90 сая м3 ахуйн болон урьдчилан цэвэрлэсэн үйлдвэрийн хаягдал усыг цэвэршүүлэх хүчин чадалтай.
Мөн шинэ цэвэрлэх байгууламж нь бохир ус цэвэрлэх болон лаг боловсруулах гэсэн үндсэн хоёр технологийн дагуу ажиллахаар төлөвлөсөн. Цэвэрлэх байгууламжаас гарсан лагийг бүрэн боловсруулж, биохий үйлдвэрлэн дулаан болон цахилгаан эрчим хүч гарган авснаар цэвэрлэх байгууламжийн цахилгааны хэрэглээний 25% орчим хувийг хангах юм. Түүнчлэн хаягдал ус дахин боловсруулах үйлдвэрт нийлүүлж буй усыг дахин боловсруулснаар ДЦС-3, ДЦС-4-ийн хөргөлтийн системд ашиглахаар төлөвлөж байна. Дахин боловсруулсан усыг ДЦС-д ашигласнаар жилд 18 сая тонн гүний цэвэр усыг хэмнэж, Монгол Улсад хаягдал усыг дахин ашиглах дэвшилтэт шинэ технологи нутагшиж, байгаль орчинд үүсэх сөрөг үр дагаврыг бууруулж, Туул голын ай сав газрын экосистемийг сайжруулахад чухал үүрэг гүйцэтгэх юм.
