Боловсролын сайд Л. Энх-Амгалан өнөөдөр /2026.06.08/ цаг үеийн асуудлаар сэтгүүлчдийн асуултад хариулт өглөө. Тэрбээр "Малчдын хүүхдүүдийг эцэг эхтэй нь хамт сургах сургалтын олон хэлбэрийг нэвтрүүлье гэж байгаа. Зуны улиралд гэрээр болон зуслангийн сургалтаар, намар, өвлийн улиралд багийн төвийн сургалтаар суралцуулах боломжийг бүрдүүлнэ. Мөн өвлийн амралтын үеэр хүүхдүүдийн хоцрогдлыг нөхөх, дүйцүүлэх сургалт зохион байгуулах ёстой. Эцэг эхийн аль нэгтэй нь хамт дотуур байранд амьдран суралцах зэрэг олон хэлбэрийг санал болгож байна. Өнөөдөр нэг айлын нэг яндан хоёр яндан болж байгаа бодит нөхцөл бий.
Тиймээс Монголын нөхцөлд тохирсон сургалтын шинэ загвар, туршилтуудыг хэрэгжүүлж эхэлнэ гэж хэлсэн. Гэтэл үүнийг гуйвуулж ойлгож байна. Энэхүү туршилтыг таван аймгийн 30 гаруй суманд хэрэгжүүлэхээр төлөвлөсөн.
Л.Гантөмөр өөрөө Боловсролын сайд байсан хүн ерөнхий боловсролын сургуулиудад шатрын хичээл оруулах нь буруу гэж мэдэгдэл хийсэн. Өнөөдөр хүн бүр боловсролын талаар ярьдаг, боловсролын хөтөлбөр хэлэлцдэг болсон нь асуудал дагуулж байна. Харин 1–5 дугаар ангид ямар хичээлийг хэдэн цагаар оруулах талаар Боловсролын хүрээлэнгээс судалгаа, тооцоонд үндэслэн гаргасан байдаг. Боловсролын зээлийн сангийн дутагдсан санхүүжилтийг банкнаас зээл авч шийдвэрлэх асуудал яригдаж байна. Уг нь эргэн төлөгдөх ёстой 300 орчим тэрбум төгрөгийн авлага бүртгэлтэй байсан. Гэвч өмнөх 7 сайдын үед гарсан 19 тушаалаар ихэнх авлагыг чөлөөлсөн байдаг. Энэхүү чөлөөлөлт хууль ёсны байсан эсэхийг прокурорын байгууллагатай хамтран шалгасан. Одоогоор 240 гаруй хүний асуудал яригдаж байна. Хууль ёсны дагуу чөлөөлөгдсөн иргэдээс эргэн төлөлт нэхэмжлэх нь хүндрэлтэй. Энэ асуудлыг Авлигатай тэмцэх газар, Цагдаагийн ерөнхий газар, Прокурорын байгууллагатай хамтран хоёр жилийн хугацаанд шалгасан.
Боловсролын зээлийн санг хулгайч, дээрэмчдийг санхүүжүүлдэг байгууллага мэтээр ойлгож болохгүй. Дэлхийн шилдэг 100 их сургуульд тэнцэн суралцаж байгаа монгол хүүхдүүд маш цөөн байдаг бөгөөд үүгээр Монголын ард түмэн бахархах ёстой.
Гэвч өнөөдөр Боловсролын зээлийн сангийн данс улайсан байдалтай байна. Энэ жилийн үйл ажиллагааг хэрхэн санхүүжүүлэх вэ гэсэн асуудал тулгарч байна. Хамгийн том хүндрэл нь төрөөс тэргүүлэх эрэлттэй мэргэжлээр суралцаж буй оюутнуудад олгодог санхүүжилт юм. Санхүүжилт хүрэлцэхгүйгээс болж 8 мянга гаруй оюутны эрх ашиг хөндөгдөх эрсдэл үүсээд байна. Тэдний эрх ашгийг хохироож болохгүй учраас зохицуулалт хийхээс өөр аргагүй нөхцөл байдал үүссэн. Арилжааны банкуудад их, дээд сургуулиудын хадгаламж байгаа. Тиймээс арилжааны банкуудтай хэлэлцээр хийх асуудал яригдаж байна. Гэхдээ энэ асуудлыг би дангаараа шийдэхгүй, Засгийн газрын чиглэл авч ажиллана. Үндсэндээ 140 гаруй тэрбум төгрөг шаардлагатай байгаа ч одоогийн байдлаар дансанд мөнгө байхгүй байна" гэлээ.
