Улсын хэмжээнд тавдугаар сарын 17-ны өдрийн байдлаар нийслэлийн хоёр дүүрэг, 12 аймгийн 50 суманд нийт 101 удаагийн ой, хээрийн гал түймэр бүртгэгдээд байна. Энэ нь өнгөрсөн оны мөн үетэй харьцуулахад 11.8 хувиар өссөн үзүүлэлт юм. Өнгөрсөн долоо хоногт Дорнод аймагт гурав, Сүхбаатар аймагт дөрөв, Булган аймагт нэг, Хэнтий аймагт хоёр, Төв аймагт хоёр, Сэлэнгэ аймагт гурав буюу нийт 15 удаагийн ой, хээрийн түймэр гарсан байна. Бүртгэгдсэн түймрүүдээс 12-ыг нь бүрэн унтраасан бол Төв аймгийн Мөнгөнморьт, Хэнтий аймгийн Батширээт суманд гарсан хоёр түймрийг цурамд оруулжээ. Харин Сэлэнгэ аймгийн Ерөө суманд гарсан ойн түймрийг унтраахаар ажиллаж байна. Түймрийг унтраах ажиллагаанд Онцгой байдлын байгууллага, Хилийн цэрэг болон мэргэжлийн ангийн нийт 107 алба хаагч, долоон автомашин, 13 морьтой оролцож байгаа ажээ.
