Б.Энхжин, Дарьсүхбаатарын Бэлгүтэй тэргүүтэй АН-ын залуу гишүүд АН-ын дарга, УИХ дахь АН-ын бүлгийн дарга О.Цогтгэрэлд шаардлага хүргүүллээ. "Өнөөдөр Монгол Улсын ард иргэд, АН-ын мянга мянган гишүүд таниас улс төрийн эр зориг, ёс зүйн хариуцлага, алсын хараатай шийдвэрийг нэхэж байна. Судалгаагаар 2027 оны Ерөнхийлөгчийн сонгууль, 2028 оны УИХ болон орон нутгийн сонгуулиудад сүүлийн 10 гаруй жил төрийн эрхийг барьж, улс орныг туйлдуулсан МАН-ын засаглалд ялагдаж, нуран унах нь тодорхой болсон нь харагдаж байна. Гэвч энэ түүхэн боломжийг АН нам ашиглах уу, эсвэл МАН болж задрах уу гэдэг нь таны гаргах шийдвэрээс шууд хамаарна.
Учир нь 2026 оны 5-р сарын 6-ны өдрийн Үндэсний бодлогын хорооны хуралдаанаар С.Баярцогтыг Ерөнхий нарийн бичгийн даргаар томилох санал оруулж ирэх гэж буй нь МАН-ын захиалгат улс төрийн амиа хорлолт хийж байгаагаас өөрцгүй юм. С.Баярцогт Оюутолгойн гэрээгээр Монгол Улсын байгалийн баялгийг 3.5 сая иргэнийхээ ирээдүйтэй хамт худалдсан бөгөөд түүний алдааны золиосонд монголчууд бид өдөр бүр 14.6 тэрбум төгрөгийн зээлийн хүү төлж, эх орноо өрийн ангал руу түлхэж байна.
С.Баярцогт нь эрх мэдэл, албан тушаалаа урвуулан ашигласан, үндэслэлгүйгээр хөрөнгөжсөн, мөнгө угаасан гэмт хэрэгт холбогдон гурван шатны шүүхээс гэм буруутайг тогтоосон. Түүнийг намын “гал тогоонд” суулгах нь АН-ын нүүрэн дээр авлигын тамга дарахтай ижил утгатай юм.
Иймд дараах шаардлагыг гаргаж байна:
Нэгдүгээрт, С.Баярцогтыг ерөнхий нарийн бичгийн даргаар томилох гэсэн ичгүүрт саналаа нэн даруй татан авах.
Хоёрдугаарт, намын төлөөлөл болсон нэр цэвэр, ёс зүйтэй, чадварлаг залуу улс төрчийг нэр дэвшүүлж, намын шинэчлэлийг бодитоор эхлүүлэх.
Энэ бол зөвхөн нэг албан тушаалын асуудал биш бөгөөд авлигачдын орогнох байр болж мөхөх үү гэдэг АН-ын түүхэн зааг юм. Хэрэв та гишүүдийнхээ энэхүү эцсийн сануулгыг үл тоомсорлож, МАН-ын зохиолтой тоглоомыг үргэлжлүүлбэл бид таныг С.Баярцогтын хамтаар огцруулах, нам цэвэрлэх хатуу тэмцлийг цаг алдалгүй эхлүүлж, улс төрийн бүх үйл ажиллагааг явуулна гэдгээ хатуу мэдэгдэж байна." гэсэн байна.
