Ерөнхий сайд асан Л.Оюун-Эрдэнэ өнөөдөр “Бодь” групп Хууль зүй, дотоод хэргийн сайд Б.Энхбаярт 1.5 сая ам.долларын хахууль өгсөн гэх асуудлаар АТГ-т хандаж, холбогдох нотлох баримтуудыг хүлээлгэн өглөө. Тэрбээр 894 хуудас нотлох баримтыг дөрвөн бүлэгт хуваан АТГ-т өгч байгаагаа мэдэгдэв. Эрүүгийн хуулийн 22 дугаар зүйлд заасан эрх мэдэл албан тушаалаа урвуулан ашиглах, 22.4-ийн нийтийн албан тушаалтны хахууль авах, гэмт хэргийн шинжтэй үйлдлийг шалгуулахаар АТГ-т гомдол гаргаж, баримтуудыг хүлээлгэн өгч байна гэв. Б.Энхбаярын авлига авсан 2 цагийн бүтэн бичлэг байгаа гэдгийг тэрбээр хэлсэн юм. Л.Оюун-Эрдэнийг Ерөнхий сайд байхад Б.Энхбаяр танхимд нь Хууль зүй, дотоод хэргийн сайдын алба хашиж байв.
Л.Оюун-Эрдэнэ хэлэхдээ “Ч.Хүрэлбаатар Эдийн засаг, хөгжлийн сайдаар томилогдоод удаагүй байхад валютын нөөц багассаныг мэдсэн. Шалтгаан нь “Эрдэнэс Тавантолгой”-оос ачигдаж байгаа нүүрсний ихэнх нь Бодийн оффтейк гэрээтэй холбоотой байсан. Ингээд “Эрдэнэс Тавантолгой” дээр онцгой дэглэм тогтоосон. “Бодь” группийн төмөр зам барих өртөг 600 сая ам.доллар байж байгаад үе шаттай нэмэгдээд 1.3 тэрбум ам.доллар болсон. Хоёр дахин нэмэгдсэн гэсэн үг. Тиймээс ҮАБЗ-өөр нууц гэрээ хийгээд тендергүйгээр гэрээ байгуулсан гэсэн хоёр асуудлаар УИХ-ын Хянан шалгах түр хороо байгуулж, УИХ-ын гишүүн Г.Ганболдоор ахлуулсан. Гэтэл Г.Ганболд гишүүн ажлаа хийхгүй, алга болсон. Ингээд би Б.Энхбаярыг түр хороог ахлах нь зүйтэй гэж үзсэн. Учир нь Б.Энхбаяр Хөгжлийн банкны түр хороог маш сайн ахалсан, мөн өөрөө шударга ёсны илд бамбай болмоор байна гэсэн байр суурийг надад удаа дараа илэрхийлж байсан.
Ингээд УИХ 63 дугаар тогтоол баталж Б.Энхбаяраар нүүрсний түр хороог ахлуулсан. 9 хоног сонсгол хийхдээ өнөөдрийн энэ баримттай холбоотой нэг ч зүйл яриагүй, Бодийн оффтейк гэрээтэй холбоотой нэг ч зүйл яриагүй. Энэ бол Б.Энхбаяр эхэлсэн цэгээсээ сонсголын дундуур маш их өөрчлөгдсөн гэдгийг харуулж байгаа юм. Энэ нь улс төрийн шахалт дарамт байв уу, хувийн ашиг сонирхол байна уу гэдгийг би өөрөөс нь тодруулж байсан. Гэтэл улс төрийн шахалт байхгүй гэж хэлсэн. Тэр цагаас хойш бид хоёрын дунд үл ойлголцол үүсэж, би Б.Энхбаярт итгэхээ больсон. 2024 оны сонгуулийн дараа сайдаар дахин томилоогүй" гэв.
