Ойрхи Дорнод дахь геополитикийн хурцадмал байдалтай холбоотойгоор дэлхийн зах зээл дээр нефтийн үнэ өсөж, олон улсын тээвэр ложистикийн салбарт дарамт нэмэгдэж байна.
Олон улсын жишиг үнэ болох Brent Crude нефтийн ханш сүүлийн өдрүүдэд өсөх хандлагатай байна. Шинжээчдийн мэдээлснээр зах зээл нийлүүлэлтийн эрсдэлийг урьдчилан тооцож, үнэ өсгөх хүлээлтэд шилжжээ.
Дэлхийн нефтийн тээвэрлэлтийн гол гарцын нэг болох Хормүзийн хоолой орчимд аюулгүй байдлын эрсдэл нэмэгдсэн нь үнийн өсөлтийн гол хүчин зүйл болж байна. Уг бүс нутгаар дэлхийн далайн нефтийн тээврийн ойролцоогоор тавны нэг нь дамжин өнгөрдөг байна.
Бүс нутгийн тогтворгүй байдлын улмаас далайн тээврийн даатгалын шимтгэл өсөөд байна
Зарим хөлөг онгоц аюултай бүсийг тойрон урт маршрут сонгож эхэлжээ.
Энэ нь шатахууны нэмэлт хэрэглээ болон тээврийн өртгийг өсгөж, улмаар бараа бүтээгдэхүүний эцсийн үнэд нөлөөлөх эрсдэлийг бий болгож байна
Зарим улсын агаарын орон зайд хязгаарлалт тогтоогдсоноор олон улсын нислэгүүд чиглэлээ өөрчилж, шатахууны зардал нэмэгдэж байна. Үүний улмаас зарим чиглэлд тийзийн үнэ өсөх төлөв ажиглагдаж эхэлжээ.
Нийлүүлэлтийн тогтвортой байдлыг хангах зорилгоор ОПЕК болон түнш орнууд олборлолтын бодлогоо эргэн харах магадлалтай гэж шинжээчид үзэж байна. Гэсэн ч богино хугацаанд зах зээлийн савлагаа үргэлжлэх төлөвтэй байна.
Одоогийн нөхцөл байдал нь нефтийн үнэ, тээврийн зардал, даатгалын төлбөрийг нэмэгдүүлж, дэлхийн нийлүүлэлтийн сүлжээнд дарамт үүсгэж байна. Хэрэв бүс нутгийн хурцадмал байдал үргэлжилбэл инфляц болон бараа бүтээгдэхүүний үнэд цаашид нөлөөлөх магадлалтай байна.
