Америкийн Нэгдсэн Улс болон Израил улс Иран руу чиглэсэн хамтарсан цэргийн ажиллагаа эхлүүлсэн талаар олон улсын хэвлэлүүд мэдээллээ. Цохилт нь агаараас болон алсын тусгалт пуужингаар хийгдсэн бөгөөд нийслэл Тегеран хотод дэлбэрэлт болсон тухай орон нутгийн эх сурвалжууд мэдээлсэн байна.
АНУ-ын Ерөнхийлөгч Дональд Трамп мэдэгдэлдээ уг ажиллагааг “аюул заналхийллээс урьдчилан сэргийлэх зорилготой” гэж тодорхойлж, Ираны цэргийн болон пуужингийн дэд бүтцэд чиглэсэн гэж онцолсон байна.
Ираны албаныхан цохилтыг “түрэмгийлэл” хэмээн буруутгаж, хариу арга хэмжээ авах болно гэдгээ мэдэгдэв. Зарим мэдээллээр Ираны талаас Израилын чиглэлд пуужин харвасан байж болзошгүй тухай дурдсан ч энэ мэдээлэл албан ёсоор баталгаажаагүй байна.
Шинжээчдийн үзэж буйгаар уг үйл явдал нь Ойрхи Дорнодын бүс нутгийн нөхцөл байдлыг хурцатгаж, дэлхийн эрчим хүчний зах зээл болон олон улсын аюулгүй байдалд сөргөөр нөлөөлж болзошгүй ажээ. НҮБ болон Европын холбооны зүгээс талуудыг тэвчээртэй байж, дипломат яриа хэлэлцээг сэргээхийг уриалсан байна.
Одоогоор хохирол, хүний амь насны талаарх албан ёсны тоо мэдээлэл гараагүй бөгөөд нөхцөл байдал хурдацтай өөрчлөгдөж байна
