Хүүхдийн эрхийн зөрчлөөс урьдчилан сэргийлэх, хүүхдийн хөдөлмөрийн тэвчишгүй хэлбэрийг таслан зогсоох үүднээс өвөл, хаврын улиралд зохион байгуулагдах хурдан морины уралдаан, сунгаа, үсэргээнд 18 нас хүртэлх хүүхдийг аливаа хэлбэрээр оролцуулахгүй байх шийдвэр Засгийн газраас гаргасан. Гэвч хавар өвлийн хурдан морины сорилго, уралдаанд насанд хүрээгүй хүүхдийг уралдуулах асуудал гарсан хэвээр байгаа юм. Энэ талаар Хүний эрхийн үндэсний комиссоос мэдээлэл хийлээ. Хориглосон хугацаанд 22 хүүхэд хурдан морь унаж нас барсан. Мөн 52 хүүхэд мориноос унаж гэмтлийн зэрэг тогтоолгосон гэж ХЭҮК мэдээлэв.
ХЭҮК-ын Гомдол, хяналт шалгалтын хэлтсийн дарга Г.Ууганбаярын хэлснээр "Хоёрдугаар сар гараад хөдөө орон нутагт хурдан морины уралдаан, сунгаа зохион байгуулж эхэлсэн бөгөөд насанд хүрээгүй хүүхэд морины үсэргээ, сунгаанд хүүхэд оролцож байгаа тохиолдол тасралтгүй гарсаар байгаа аж. Хамгийн сүүлд Хөвсгөл аймгийн Галт суманд хурдан морины ажил хийж байсан унаач хүүхэд амь насаа алдсан харамсалтай тохиолдол гарчээ. Мөн Төв аймгийн Сэргэлэн суманд хурдан морины үсэргээний шинжтэй үйл ажиллагаа болсон байна.
ХЭҮК-оос хориглосон хугацаанд хурдан морины уралдаан, үсэргээ, уралдаан зохион байгуулахгүй байх зөвлөмжийг бүх шатны байгууллагад хүргүүлж ирсэн ч хурдан морины үсэргээ болсон, Засгийн газрын тогтоолын хэрэгжилтийг орон нутагтаа хангаж ажиллаагүй нэр бүхий зургаан аймгийн 11 сумын Засаг даргад хариуцлага тооцжээ. Сүүлийн 10 жилийн хугацаанд 46 хүүхэд хурдан мориноос унаж нас барсан байна.
