Шинжлэх ухааны ажилтны өдрийг жил бүр тэмдэглэн өнгөрүүлэхийн зэрэгцээ Шинжлэх ухааны академи, “Эрдэнэт үйлдвэр” ТӨҮГ, “Стартап Монгол” ТББ нь шинжлэх ухаан, инновацын үйл ажиллагаа болон ойлголтыг олон нийтэд түгээх, инновацын соёлыг төлөвшүүлэх зорилгоор “Эрдэм Хакатон-2025” уламжлалт тэмцээнийг 2025 оны 11 дүгээр сарын 07-ноос 11-ний өдрүүдэд 7 дахь жилдээ амжилттай зохион байгууллаа.
Энэ жилийн тэмцээнд Улаанбаатар хот болон бүс, орон нутгаас нийт 28 төсөл оролцсон бөгөөд нэг, хоёрдугаар шатны шалгаруулалтаар 18 төслийг сонгон, эцсийн шалгаруулалтад оруулсан. Тус тэмцээний шүүгч, зөвлөх, оролцогчоор “Эрдэнэт үйлдвэр” ТӨҮГ-аас Хөгжлийн хэлтсийн дарга Ц.Цэнд-Аюуш, “Эрдэнэт цогцолбор” дээд сургуулийн Эрдэмтэн нарийн бичгийн дарга Б.Пүрэвдорж, Инновац, оюуны өмчийн мэргэжилтэн М.Энхцацрал нар оролцсон.
Эцсийн шалгаруулалтаар, Мал Эмнэлгийн Эм Судлалын Хүрээлэн /НҮТББ/-ийн “ШИМТ ДЭЛҮҮ-ШИЛДЭГ БЭЛДМЭЛ” нь ЭЗХЯ-ны Сайдын нэрэмжит 20 сая төгрөгийн шагнал, Хими, химийн технологийн хүрээлэнгийн "ТУНХУУ" ҮЕ МӨЧНИЙ ҮРЭВСЭЛ ДАРАХ ТОСОН нь ШУА-ийн Ерөнхийлөгчийн нэрэмжит 10 сая төгрөгийн шагнал, Ботаникийн цэцэрлэгт хүрээлэнгийн “BETULACEA-BIONOVA” багийн дэвшилтэт арга, технологи нь “Эрдэнэт үйлдвэр” ТӨҮГ-ын Ерөнхий захирлын нэрэмжит 10 сая төгрөгийн грант, шагналыг тус тус хүртсэн. Мөн “Стартап Монгол” ТББ-ын нэрэмжит 1 сая төгрөгийн шагналыг Хими, химийн технологийн хүрээлэнгийн “REGROUND LAB” баг хүртлээ.
