“Эрдэнэт үйлдвэр” ТӨҮГ-ын дэргэдэх, ШУТИС-ийн харьяа, Ш.Отгонбилэгийн нэрэмжит “Эрдэнэт цогцолбор” дээд сургуулийн 50 жилийн ойн хүрээнд “ESSEM 2025” Олон улсын эрдэм шинжилгээний хурал өнөөдөр эхэллээ.
Анх удаа зохион байгуулж буй тус хуралд ОХУ, БНХАУ, АНУ, ХБНГУ, БНСУ, Япон зэрэг долоон орны эрдэмтэн судлаачид оролцож, уул уурхай болон материал судлалын чиглэлээр илтгэлээ танилцуулж байна. Хурлын хүрээнд Эрдэнэт үйлдвэрийн стратегийн зорилтуудыг дэмжин, эцсийн бүтээгдэхүүний нэр төрлийг нэмэгдүүлэх, нэмүү өртөг шингэсэн шинэ бүтээгдэхүүн үйлдвэрлэхэд шаардлагатай шинжлэх ухааны үндэслэл, технологийн шийдлийг хэлэлцэх юм.
Эрдэнэт үйлдвэрийн Ерөнхий захиргааны 2-р байрны “Оюу” танхимд зохион байгуулагдаж буй “ESSEM 2025” эрдэм шинжилгээний хуралд өнөөдөр “Эрдэнэт үйлдвэр” ТӨҮГ-ын Ерөнхий инженер, доктор (Ph.D) Т.Батмөнх “Зэс-порфирын ордын эрдсийн хам ургал, хатуулгаас хамаарах баяжуулах технологийн судалгаа”, Японы Нагаокагийн технологийн их сургуулийн профессор, доктор (Ph.D) Макото Нанко “Эрдэнэт үйлдвэрийн хатуу хайлшны хаягдлыг дахин боловсруулах судалгаа”, БНСУ-ын Улсаны их сургуулийн судлаач, доктор (Ph.D) Г.Болормаа “Эрдэнэт үйлдвэрээс олборлосон байгалийн түүхий молибденыг батарейн анод материалд ашиглах боломж” зэрэг олон улсын 20 гаруй судлаачдын илтгэл хэлэлцүүлж байна.
Оролцогчид энэхүү хурлыг уул уурхайн салбарын шинэлэг санаа, судалгааны чиг хандлагыг олж мэдэхийн зэрэгцээ туршлага солилцох онцгой боломж хэмээн онцоллоо.
