Пүрэв гарагаас эхлэн ихэнх нутгаар хүйтний эрч эрс чангарч, шөнөдөө -45 хэм хүртэл хүйтэрнэ гэж Цаг уур, орчны шинжилгээний газраас мэдээлэв. Энэ сарын 13-нд Баян-Өлгий, Ховд, Говь-Алтай, Баянхонгор, Өмнөговь аймгийн нутгаар салхи шуургатай байх бол нэгдүгээр сарын 15-18-нд ихэнх нутгаар хүйтний эрч эрс чангарч, жавартай хүйтэн байх ажээ. Мөн нэгдүгээр сарын 13-нд Увс нуурын хотгор болон Алтай, Хангай, Хөвсгөлийн уулархаг нутгаар, 14-нд баруун болон төвийн аймгуудын нутгийн зарим, говийн аймгуудын нутгийн хойд, зүүн аймгуудын нутгийн өмнөд хэсгээр, 15-нд төвийн аймгуудын нутгийн өмнөд хэсэг, говь болон зүүн аймгуудын нутгийн зарим газраар, 16-нд нутгийн зүүн өмнөд хэсгээр, 17-18-нд нутгийн зарим газраар цас орж, цасан шуурга шуурах төлөвтэй байна.
Салхи: 14-нд баруун аймгуудын нутгаар, 15-17-нд нутгийн зарим газраар түр зуур секундэд 18-20 метр хүрч ширүүснэ. Агаарын температурын хувьд нэгдүгээр сарын 13, 14-нд ихэнх нутгаар хүйтний эрч сулавтар байх боловч 15-наас ихэнх нутгаар хүйтний эрч эрс чангарч Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө -40-45 хэм, өдөртөө -29-34 хэм, Увс нуурын хотгор, Алтай, Хангай, Хөвсгөл, Хэнтийн уулархаг нутаг, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө -35-40 хэм, өдөртөө -25-30 хэм, говийн бүс нутгийн өмнөд хэсгээр шөнөдөө -18-23 хэм, өдөртөө -12-17 хэм, бусад нутгаар шөнөдөө -25-30 хэм, өдөртөө -19-24 хэм хүйтэн байх төлөвтэй байна.
Хүйтний эрч чангарч буй эдгээр өдрүүдэд хөдөө орон нутгийн замд зорчихдоо техникийн бүрэн бүтэн байдлыг хангаж хол замд зорчих мөн малчид малаа ойр бэлчээж бага насны хүүхэд болон ахмад болон хөгжлийн бэрхшээлтэй иргэдийг малын хойноос явуулахгүй байхыг анхааруулж байна. Мөн цаг агаарын мэдээг цаг алдалгүй албаны эх сурвалжуудаас авч байхыг холбогдох албаныхнаас сануулав. Улаанбаатар хот орчмоор, энэ сарын 14-нд цас, 15-нд ялимгүй цас орж, зөөлөн шуурга шуурна. Нэгдүгээр сарын 15, 17, 18-нд салхи секундэд 5-10 метр, зарим үед секундэд 12-14 метр хүрч ширүүснэ. Агаарын температурын хувьд нэгдүгээр сарын 13, 14-нд хүйтний эрч сулавтар Яармаг-Сонгины орчмоор -21-26 хэм, бусад хэсгээр -15-20 хэм, өдөртөө -8-13 хэм хүйтэн байх бол нэгдүгээр сарын 15-21-нд хүйтний эрч чангарч Яармаг-Сонгины орчмоор -31-36 хэм, бусад хэсгээр -25-30 хэм, өдөртөө -19-26 хэм хүртэл хүйтэрнэ.
