УИХ дахь Ардчилсан намын бүлэг өнөөдрийн /2025.12.15/ ээлжит хуралдаанаа хийж, хууль эрх зүйн шинэчлэлтэй холбоотой хоёр чухал асуудлыг хэлэлцэн, холбогдох танилцуулга мэдээллийг сонслоо. Тус хуралдаан нь сонгуулийн хууль тогтоомжийг боловсронгуй болгох, мөн төрийн болон албаны нууцтай холбоотой эрх зүйн орчныг шинэчлэх асуудалд төвлөрсөнөөрөө онцлог байв.
Хуралдааны эхэнд сонгуулийн зохион байгуулалтын явцад практикт тулгардаг, эрх зүйн нарийвчилсан зохицуулалт шаардлагатай асуудлуудын талаар хэлэлцэв. Энэ хүрээнд Сонгуулийн хууль тогтоомжийг боловсронгуй болгох зорилгоор УИХ дахь Ардчилсан намын бүлгээс байгуулсан ажлын хэсгийн үйл ажиллагааны талаар ажлын хэсгийн ахлагч, УИХ-ын гишүүн Ж.Батсуурь гишүүдэд дэлгэрэнгүй мэдээлэл өглөө. Тэрбээр өнгөрсөн сонгуулиудад илэрч байсан маргаантай зохицуулалтууд, давхардал, тодорхой бус заалтууд нь сонгуулийн шударга, ил тод байдалд нөлөөлж байгааг дурдан, эдгээрийг засч сайжруулах шаардлагатайг онцолсон байна.
Мөн хуралдаанд Сонгуулийн Ерөнхий Хорооны дарга П.Дэлгэрнаран болон холбогдох албаны хүмүүс оролцож, сонгуулийн хууль тогтоомжийн хэрэгжилт, тулгамдаж буй асуудлуудын талаар мэдээлэл өгч, УИХ-ын гишүүдийн асуултад хариуллаа. Энэ үеэр сонгуулийн зохион байгуулалт, хяналт, маргаан шийдвэрлэх тогтолцоог илүү ойлгомжтой, тогтвортой болгох, сонгогчдын итгэлийг нэмэгдүүлэх шаардлагын талаар санал солилцсон байна.
Хуралдааны хоёр дахь асуудлаар “Төрийн болон албаны нууцын тухай хуульд нэмэлт өөрчлөлт оруулах тухай” хуулийн төслийн танилцуулга мэдээллийг сонсов. Танилцуулгын үеэр төрийн болон албаны нууцтай холбоотой одоогийн эрх зүйн зохицуулалт нь мэдээллийн ил тод байдал, иргэдийн мэдэх эрх, нөгөө талаас үндэсний аюулгүй байдлыг хангах шаардлагын хооронд тэнцвэртэй байх ёстойг онцолсон байна. Түүнчлэн хуулийн нэмэлт, өөрчлөлтийн төсөл нь нууцын ангилал, хадгалалт, хамгаалалт, ашиглалттай холбоотой зохицуулалтыг илүү тодорхой болгох, хэрэгжилтийн явцад гарч буй ойлгомжгүй байдал, зөрчилдөөнтэй заалтуудыг засахад чиглэж байгааг дурдав.
Мөн мэдээллийн технологийн хөгжил, цахим орчин дахь мэдээллийн урсгал эрчимжиж буй өнөө үед төрийн болон албаны нууцыг хамгаалах арга механизмийг шинэ нөхцөлд нийцүүлэх шаардлага тулгарч байгааг танилцуулгадаа онцолжээ. Энэ нь нэг талаас төрийн аюулгүй байдлыг хангах, нөгөө талаас иргэдийн мэдээлэл авах эрхийг хязгаарлахгүй байх зарчмыг баримтлахад чиглэсэн өөрчлөлт болохыг тайлбарласан байна.
