Аж үйлдвэр эрдэс баялгийн яамны Төрийн нарийн бичгийн дарга Б.Дашпүрэв шатахууны нөхцөл байдалтай холбогдуулан Замын хөдөлгөөний удирдлагын төвд өчигдөр /2025.12.02/ ажиллажээ Энэ үеэр шатахуун түгээх станцуудад эхнээсээ нийлүүлэлт хийж зарим шатахуун түгээх станц 10 гаруй авто машины оочиртой байсан гэж АҮЭБЯ-наас мэдээлэв. Төрийн нарийн бичгийн дарга Б.Дашпүрэвийн хэлснээр “Ашигт малтмал, газрын тосны газар болон Аж үйлдвэр эрдэс баялгийн яамны төрийн албан хаагчид шатахуун түгээх станцууд болон агуулахуудад мэдээлэл өгч ажиллаж байгаа. Шатахуун импортлогч компаниуд тээврийн цагдаагийн албатай хамтран аюултай ачаагаа тээвэрлэн явуулж байна” гэлээ Мөн шатахууны гол нийлүүлэгч ОХУ-аас арванхоёрдугаар сард худалдан авах бүтээгдэхүүний захиалга баталгаажсан тул нийлүүлэлт тасрахгүй хэвийн үргэлжилнэ гэлээ. Түүнчилэн БНХАУ-аас 10 мянган тонн дизель түлш худалдан авахаар болжээ.
Ерөнхий сайд Г.Занданшатар болон Аж үйлдвэр эрдэс баялгийн сайд Г.Дамдинням нарын баг ОХУ-д өнгөрсөн сард хийсэн айлчлалын үр дүнд шатахууны импортыг нэмэгдүүлэхээр болсон. Тухайлбал, манай улс ОХУ-аас арваннэгдүгээр сард АИ-92 автобензин 75 мянган тонныг худалдан авч хэрэглэжээ. Энэ нь сарын дундаж хэрэглээг 10 мянган тонноор нэмэгдүүлсэн дүн юм байна.
Хөдөө орон нутагт шатахууны нийлүүлэлт тасарсан гэх мэдээллүүд олон нийтийн сүлжээгээр явж буй.
Тэгвэл баруун бүсэд төвийн бүсээс хангалт хийгдэж байгаа бөгөөд удахгүй хангалт хэвийн болно гэсэн хариуг яамнаас өглөө. Мөн зүүн бүсэд Эрээнцав боомтоор шатахууны нийлүүлэлтийг тасралтгүй хийж байгаа бөгөөд энэ сарын 1-ний өдрийн байдлаар 16 вагон цистерн АИ-92 төрлийн бүтээгдэхүүн импортолж түгээлтэд гарчээ. Түүнчлэн говийн бүс рүү түгээлтийг нэмэгдүүлэх, орон нутгийн дизель түлшний хэрэглээг хэвийн байдалд оруулах талаар импортлогч компаниудтай Аж үйлдвэр, эрдэс баялгийн яамнаас энэ чиглэлд хоёр хоногийн дотор түгээлтийг сайжруулах талаар ярилцаж, хэвийн болгоход нь анхаарч түгээлтийг сайжруулж байгаа гэв.
