Энэтхэгийн Дэли хотод метроны буудлын ойролцоо машин дэлбэрч, 10 хүн амиа алдаж, 30 гаруй хүн "хүнд гэмтжээ.
Дэлбэрэлтийн шалтгаан одоогоор тодорхойгүй байгаа бөгөөд Энэтхэг даяар нисэх онгоцны буудал, төмөр замын өртөө, засгийн газрын барилга байгууламж, өвийн дурсгалт газруудыг өндөржүүлсэн бэлэн байдалд оруулсан байна.
Дэлбэрэлт болохоос өмнөхөн гэрлэн дохионы ойролцоо нэг тээврийн хэрэгсэл "зогссон. Тэр машинд дэлбэрэлт болсон. Тээврийн хэрэгсэлд байсан зорчигчид болон эргэн тойрны тээврийн хэрэгслүүдэд байсан хүмүүс дэлбэрэлтэд өртсөн” гэж цагдаагийн байгууллагаас мэдээлэв. Дэли хотын гал түймрийн албаны орлогч даргын мэдээлснээр дэлбэрэлтээс үүдэж зургаан тээврийн хэрэгсэл шатсан байна.
Дэлбэрэлт орон нутгийн цагаар 18:55 цагт болсон ба дуудлага хүлээн авсны дараа яаралтай тусламжийн баг галыг унтрааж амьд үлдсэн хүмүүсийг ойролцоох эмнэлэгт хүргэжээ.
Энэтхэгийн Дотоод хэргийн сайд Амит Шахын хэлснээр, эрх баригчид дэлбэрэлтийн ойролцоох хяналтын камеруудыг шалгаж байгаа бөгөөд хэргийг бүх өнцгөөс шалгана гэдгээ мэдэгдлээ.
