Шинэ төв цэвэрлэх байгууламжийг барих ажлыг 2020 онд эхлүүлсэн.
Тэгвэл БНХАУ-ын хөнгөлөлттэй зээлээр баригдаж буй Улаанбаатар хотын шинэ Төв цэвэрлэх байгууламжийн ажил 95 хувьтай үргэлжилж байна гэж УСУГ-ын дарга Ц.Төрхүү хэллээ. Шинэ Төв цэвэрлэх байгууламж нь Сонгинохайрхан дүүргийн 20 дугаар хорооны нутаг дэвсгэрт, одоогийн цэвэрлэх байгууламжийн баруун талд био цөөрмийн талбайд баригдаж байгаа бөгөөд нийт 17.6 га газрыг хамарна. Энэ том бүтээн байгуулалтыг ирэх 10 дугаар сар гэхэд хүлээн авч бүрэн ашиглалтад оруулахаар төлөвлөжээ. Энэ сарын 23-24-нд эхний туршилтыг хийж 70м.куб бохир усыг татан цэвэрлэсэн ба 9 сард дахин ийм туршилтыг явуулж үйл ажиллагааг эхлүүлэх бэлтгэл ажлыг хангах юм байна.
Баригдаад 60 гаруй жил болж буй хуучин Төв цэвэрлэх байгууламж нь голдуу механик ажиллагаатай. Харин шинэ төв цэвэрлэх байгууламж нь технологийн хувьд илүү автомат, хэрэглэж буй бодисын хувьд ч өөр байна гэж албаны хүмүүс онцолж байна. Өөрөөр хэлбэл шинэ цэвэрлэх байгууламж нь дэлхий нийтэд одоо ашиглаж буй цэвэрлэх байгууламжийн түвшинд хүрсэн байгууламж байх ажээ. Хуучин төв цэвэрлэх байгууламжид 200 гаруй хүн ажилладаг бол шинэ цэвэрлэхэд 70 гаруй хүн ажиллана гэдэг нь энэ хэрээр хүний ажиллагааг хөнгөвчилсөн гэдгийг харуулж байгаа юм.
Шинэ төв цэвэрлэх байгууламж ашиглалтад орсноор "өмхий үнэр"-ийн асуудал арилах уу гэх асуулт олон нийтэд байгаа. Тэгвэл үүнд "Үнэр багасна. Бүр арилна гэж хэлж чадахгүй" гэж УСУГ-ын дарга Ц.Төрхүү хэллээ. Учир нь шинэ төв цэвэрлэх байгууламжийг ашиглалтад оруулсан ч нийслэлийн ачааллыг тооцоход хуучин цэвэрлэх байгууламжаа хосолмол байдлаар ажиллуулахаас аргагүй байгаа аж. Хуучин цэвэрлэх байгууламж нь анхнаасаа лагийг задгай хатаах технологитой. Лагийг ил задгай хатаах бус шатаах технологитой цэвэрлэх байгууламжуудтай болсон цагт өмхий үнэртэх асуудал гарахгүй байх боломжтой юм байна.
