БНХАУ-ын хөнгөлөлттэй зээлийн хөрөнгөөр хэрэгжиж буй "Төв цэвэрлэх байгууламжийг шинээр барих төсөл"-ийн цахилгаан хангамжийн барилга угсралтын ажил дууссантай холбогдуулан уг байгууламж дээр өнөөдөр Улсын комисс ажиллаж байна.
Тус комиссын даргаар Эрчим хүчний яамны Эрчим хүчний бодлогын хэрэгжилтийг зохицуулах газрын Цахилгааны хэлтсийн шинжээч Б.Баясгаланбаатар ажиллаж байгаа бөгөөд бүрэлдэхүүнд:
Төрийн өмчийн бодлого зохицуулалтын газрын Төрийн өмчийн бүртгэл, ашиглалтын хэлтсийн мэргэжилтэн Р.Ширчинням,
Онцгой байдлын Ерөнхий газрын барилга зураг төсөл хариуцсан мэргэжилтэн Е.Лхагвадорж,
Үндэсний төв архивын Зураг төслийн баримтын архивын эрхлэгч Я.Чулуун,
"Улаанбаатар цахилгаан түгээх сүлжээ" ТӨХК-ийн Өндөр хүчдэл, ашиглалт засварын төвийн дарга Д.Даваатамир,
Ус сувгийн удирдах газрын инженерийн бодлого төлөвлөлтийн хэлтсийн дарга Н.Одхүү,
Хот байгуулалт, барилга, орон сууцжуулалтын яамны /ХББОСЯ/ Улаанбаатар хотын төв цэвэрлэх байгууламжийг шинээр барих төслийн цахилгааны инженер Р.Даваасүрэн,
ХББОСЯ-ны Улаанбаатар хотын төв цэвэрлэх байгууламжийг шинээр барих төслийн зохицуулагч Г.Чулуунбат,
Төслийн Ерөнхий гүйцэтгэгч БНХАУ-ын "CTCE" групп ХХК-ийн Ерөнхий инженер Жанг Жиа Вэй нар болон бусад холбогдох хүмүүс ажиллаж байна.
Уг байгууламж нь хуучин төв цэвэрлэх байгууламжийн баруун талд 17.6 га талбайд хэрэгжиж байгаа бөгөөд 2020 онд Монгол Улсын Засгийн газар, БНХАУ-ын Засгийн газар хооронд байгуулсан 1 тэрбум ам.долларын хөнгөлөлттэй зээлийн гэрээг үзэглэснээр дээрх төсөл хэрэгжиж эхэлсэн юм. Шинэ төв цэвэрлэх байгууламжийг энэ оны хоёрдугаар хагаст ашиглалтад оруулахаар төлөвлөжээ.
