Өмнөд Африкийн зүүн Кейп мужид хүчтэй аадар бороо болон цас орсны улмаас 50 хүн нас барсан харамсалтай тохиолдол энэ 7 хоногт гарсан.
Бороо болон цаснаас үүдсэн үерт автобустай явж байсан сургуулийн сурагчид ч өртөж амиа алдсан. Олон зуун оршин суугчдыг нүүлгэн шилжүүлж, олон хүмүүс түр хоргодох байранд хонож байгаа.
Тэгвэл сураггүй болсон хүмүүсийг эрэн хайх ажиллагаа тус мужид үргэлжилж, гамшгаас үүдсэн цахилгаан тасарсан, эвдэрсан зам харгуйг засах ажиллагаа үргэлжилж байна. Хүчтэй цас, бороо, хүчтэй салхинаас болж мягмар гарагаас хойш 500,000 орчим байшин цахилгаангүй болсон юм.
Албаны хүмүүсийн мэдээлснээр Зүүн Кейпийн 58 сургууль, гурван дүүрэг энэ гамшигт өртсөн байна. "Энэ олон жилийн турш ийм зүйлийг хэзээ ч харж байгаагүй" гэж мужийн дарга хэлжээ. Тус мужтай хөрш зэргэлдээ КваЗулу-Натал мужид есөн дүүргийн 68 сургууль үерт эвдэрсэн ч амиа алдсан тохиолдол бүртгэгдээгүй байна.
Өмнөд Африкийн Ерөнхийлөгч Сирил Рамафоса амиа алдагсдын ар гэрийнхэнд эмгэнэл илэрхийлээд, улс даяар цаг агаарын гэнэтийн байдал таамаглашгүй нөхцөл байдал үүсгэж байгаа тул болгоомжтой, нэг нэгэндээ анхаарал халамж тавьж, хамтран ажиллахыг иргэддээ уриалжээ.
