Үндэсний хэмжээний “Нарны охид” төслийнхөн долоон жилийн турш 1300 гаруй охидоос ирүүлсэн захидлаас шигшин эмхэтгэсэн “Охидын мянган захидлын хариу” номоо албан ёсоор уншигчдад хүртээл болголоо.
Охидын зүрх сэтгэлийн үгс шингэсэн захидлын хариуд сэтгэл зүйч, судлаачид, “Нарны охид” төслийн хамт олон, олны танил эрхмүүд болон өнөөгийн охид залуусын дууриалал болсон залуучуудын төлөөлөл зөвлөгөө, сэтгэгдлээ номоор илэрхийлсэн байна.
Энэхүү номыг “Амьдрал бол бэлэг” төслийнхөн халуун сэтгэлээр дэмжиж, тэдний төлөөлөл болсон УЗ-ын гишүүн Б.Онон мэндчилгээ дэвшүүллээ.
Мөн судлаач Б.Лакшми, “Болор цом”-ын эзэн яруу найрагч Н.Гантулга, “Хүмүүн бичиг” сонины эрхлэгч, Соёлын гавьяат зүтгэлтэн Б.Элбэгзаяа, МЗХ-ны Ерөнхий нарийн бичгийн дарга П.Анхбаяр, дэд ерөнхийлөгч Н.Гансүх, реппер ThunderZ болон охидын төлөөлөл болон Налайх дүүргийн “Нарны охид” клубын тэргүүн Хулан, Хан-Уул дүүргийн Чинхүслэн, төслийн санаачлагч, багш нар зэрэг олон хүн сэтгэлийн үгээ илэрхийллээ.
Ийнхүү охидын мянган захидал ном болон Монгол Улсын өнцөг булан бүрт тараагдахад бэлэн боллоо.
Мөн нээлтийн үеэр “Нарны охид” төслийг санаачлагч, удирдагч Жамбалын Нямаагийн хоёр дахь шүлгийн ном болох ханьдаа зориулсан “Зүрхэн сахиус” яруу найргийн ном хэвлэгдэн гарсан давхар баяр тохиолоо.
