Улаанбаатар хотод жил бүрийн намар шинэ ургацын ногооны томоохон үзэсгэлэн худалдаа зохион байгуулагддаг. Эх сурвалжийн мэдээлснээр энэ жилийн хувьд есдүгээр сарын 25-наас эхлэн долоо хоногийн хугацаанд орон нутгийн тариаланч, ногоочид бүтээгдэхүүнээ борлуулах үзэсгэлэн худалдааг Төв цэнгэлдэх хүрээлэнд зохион байгуулахаар төлөвлөжээ.
Өнөөдрийн байдлаар нийслэлд 21 байршилд хүнсний ногооны худалдаа зохион байгуулж байгаа билээ. Ногооны худалдаачид нийтийн эзэмшлийн талбайд түрээс төлдөггүй бол хувийн эзэмшлийн газарт түрээс төлдөг. Хэрэв нийтийн эзэмшлийн талбайд асар барьж, ногооны худалдаа зохион байгуулах бол тухайн дүүргийн Хүнс, худалдаа үйлчилгээний хэлтэст хандаж бүртгүүлэх зохицуулалттай.
Нийслэлийн 21 байршилд гарч буй ногооны өргөтгөсөн худалдааны зарим нь 11 дүгээр сар хүртэл үргэлжлэх юм байна. 
