Өмнөговь аймгийн Цогтцэций, Баян-Овоо, Ханбогд сумын нутагт байрлах “Тавантолгой-Гашуунсухайт чиглэлийн төмөр замын цогцолбор төсөл”-ийг 2020 онд эхлүүлж, чанарын өндөр түвшинд барьж байгуулан 2023 онд ашиглалтад оруулж, тээвэрлэлтийг үйл ажиллагааг эхлүүллээ. /2024.05.27/
Дэлхийд зүтгүүрийн үйлдвэрлэлээр тэргүүлэгч “Progress Rail A Caterpillar” компанийн SD70ACe/LW загварын 16 зүтгүүр Монгол Улсад нийлүүлэгдэхээс эхний ээлжийн 6 зүтгүүрээ хүлээн авч, тээвэрлэлтэд нэвтрүүлэхэд бэлэн болсон. Хүнд даацын төмөр замын тээврийн салбарт бүрэн хүлээн зөвшөөрөгдсөн өндөр хүчин чадал бүхий энэхүү зүтгүүрүүд нь зах зээлд амжилттай туршигдсан дизель хөдөлгүүртэй. Мөн инновац шингээсэн радиал тэргэнцэр нь манай улсын хувьд анх удаа нэвтрүүлж буй явах ангийн бүтээц юм.
Зүтгүүрийн депо:
“Тавантолгой- Гашуунсухайт” чиглэлийн төмөр замын цогцолбор төслийн нэг гол бүрэлдэхүүн хэсэг болох зүтгүүрийн засварын төв. Монгол Улсдаа анх удаа АНУ-ын зүтгүүрт зориулан зураг төсөл, төлөвлөлтийн дагуу барьж байгуулсан. Тус засварын төв арчилгаа үйлчилгээ, засвар хийх зориулалтын 34 тоног төхөөрөмж, 112 гар болон цахилгаан багажаар тоноглогдсон бөгөөд эдгээрийг 9 үндсэн цех, 12 туслах цехэд хуваан байршуулсан. Нийт 2125 м2 талбайд үзлэгийн 3 зам байрлах ба 6 зүтгүүрт зэрэг арчилгаа, засварын ажил хийх боломжтой юм.
Вагон депо:
Мөн цогцолбор төслийн хүрээнд хийгдсэн томоохон ажлуудын нэг Вагон засварын депо нь ОХУ, БНХАУ, Украйн зэрэг улсад үйлдвэрлэгдсэн дэвшилтэт технологийн хамгийн сүүлийн үеийн автомат болон хагас автомат тоног төхөөрөмжүүдээр бүрэн тоноглогдсон. Нийт 3528 м2 6 засварын талбайд их болон дунд засвар, үйлчилгээ хийх орчин үеийн тусгай зориулалт бүхий 164 бүрэн автомат, 31 механик, 90 гар багажаас бүрдсэн 285 багц тоног төхөөрөмжтэй.
Уг засварын төв нь жилд 1300-1500 орчим вагонд их болон дунд засвар, арчилгаа үйлчилгээ хийх, 3800 тэргэнцэр, 7200 хос дугуй болон бусад 12000 эд ангийг оношилж, сэргээн засварлах хүчин чадалтай юм. Мөн механик цехэд CNC удирдлагатай TCK-50A загварын токарийн суурь машин, CNC плазма зүсэгчийг нэвтрүүлсэн онцлогтой.
МУ-ын Засгийн газар, Зам, тээврийн хөгжлийн яамнаас ойрын ирээдүйд төмөр замын сүлжээгээ 4 дахин өргөтгөн, ачаа тээврийн хэмжээг 5 дахин нэмэгдүүлж 180 сая тоннд хүргэх бодлого баримтлан ажиллаж байна гэж Зам тээврийн хөгжлийн сайд С.Бямбацогт солш сүлжээндээ бичжээ.
Үүнийг бодит ажил хэрэг болгоход хамгийн чухал нь сайн техник, хөдлөх бүрэлдэхүүний бүрэн бүтэн байдал.
Тийм ч учраас бид өнөөдөр АНУ-д үйлдвэрлэсэн 4500 морины хүчин чадалтай хамгийн сүүлийн үеийн 6 зүтгүүрийг ачаа тээвэрлэлтэд ашиглаж эхлэхэд бэлэн болоод байна.
Түүнээс гадна жилд 1500 ачааны вагон засах хүчин чадалтай, ОУ-ын чанар стандартад нийцсэн тоног төхөөрөмж бүхий зүтгүүр, вагоны засварын төвийн төслийг амжилттай хэрэгжүүлж үйл ажиллагааг нь эхлүүллээ.
Ингэснээр экспортын хэмжээ нэмэгдэж эдийн засгийн эргэлт сайжрах, төмөр замын тээврийн зардал 3-4 дахин буурах, төмөр замын салбарыг шинэ шатанд хүргэх чухал ач холбогдолтой гэж сайд дүгнэжээ.
