Морин хуурыг эрхэмлэн дээдэлж, түгээн дэлгэрүүлэх тухай Монгол Улсын Ерөнхийлөгчийн зарлиг гараад удаагүй байна. Хилийн чанадад морин хуурыг өвлөн уламжилж, түгээн дэлгэрүүлэхэд хүчин зүтгэж яваа хүмүүсийн нэг бол БНХАУ-ын Өвөрмонголын урлагийн дээд сургуулийн багш, дэд профессор, морин хуурч А.Эрдэнэбөх ажээ. Тэрбээр Монгол Улсад ирж СУИС-д урлаг судлалын чиглэлээр доктор цол хамгаалсан бөгөөд хувийн сургалт, хамтлаг, чуулга бас хуурын үйлдвэртэй юм байна. А.Эрдэнэбөх цуур, хуурын сакрал утгыг тайлах нь гэдэг сэдвээр докторын судалгаагаа хийжээ. Уг судалгаандаа морин хуурт увдислаг шинж чанар байна гэж үзсэн аж. Энэ таамаглалаа батлахын тулд маш олон хүнд морин хуурын аялгууг сонсгон туршилт хийсэн нь гайхалтай үр дүнд хүрчээ.
