Монгол Улсын иргэн, дунд сургуулийн сурагч охиныг зодож танхайрсан тухай БНСУ-ын телевизийн MBC агентлагийн сувгаар 2021 оны 12 дугаар сарын 1-ний өдрийн оройн 20 цагаас эхлэн гарчээ. Монгол Улсын иргэн, Янгсан хотын Янгсан Боми дунд сургуулийн 1-р ангийн сурагч охиныг (манайхаар 7-р анги) сургуулийнх нь үе тэнгийн хүүхдүүд 6 цагийн турш зодож, хүчээр архи уулган өрөөнд хорьсон балмад хэргийн тухай гарсан мэдээллийн мөрөөр манай улсын ГХЯ, БНСУ дахь Монгол Улсын ЭМЯ оршин суудаг Янгсан хотын Цагдаагийн газар болон түүний ээж С-тэй холбогджээ.
БНСУ-ын Өмнөд Кёнгсан мужийн Янгсан хотын Цагдаагийн газрын Эмэгтэйчүүд, хүүхдийг гэмт хэргээс урьдчилан сэргийлэх хэлтсийн дарга Ким Янг Жунтэй 12 дугаар сарын 2-ны өглөө 08 цагт холбогдож нөхцөл байдлыг тодруулсан байна. Үүнд, энэ хэрэг нь 2021 оны 7 дугаар сарын 3-нд гарсан бөгөөд тус Цагдаагийн газарт 2021 оны 7 дугаар сарын 04-нд бүртгэгдэн, мөрдөн байцаалтын ажиллагааг явуулж эхэлжээ. Сэжигтэн 4 хүүхэд байсан ба тэдний 2 нь хэрэг хүлээх насанд хүрээгүй учир 10 дугаар сарын 1-нд хэргийг нь хаасан аж. Харин хэрэг хүлээх чадвартай насанд хүрсэн бусад 2 хүүхдэд холбогдох хэргийг 10 дугаар сарын 28-нд Прокурорт шилжүүлсэн байна. Улмаар анхан шатны шүүхийн шийдвэр гарсан бөгөөд охиныг зодсон 4 хүүхдийн 2 нь хэрэг хүлээх насанд хүрээгүй гэдэг шалтгаанаар ямар нэгэн ял шийтгэл аваагүй. Нөгөө 2 нь улсын тусгаарлалтад тодорхой хугацаагаар байхаар болсон байна. Охины ар гэрийнхэн нь уг хэргийн талаар давж заалдахаа мэдэгджээ. Энэ хэрэгтэй холбогдуулан ГХЯ-наас бүхий л шатанд анхаарал хандуулан, холбогдох арга хэмжээг авч ажиллаж байгаа юм байна. Түүнчлэн ар гэрийхний нь зүгээс энэ асуудлыг дэврээх тусам хүүхдийн сэтгэл санаанд улам муугаар нөлөөлж байгаа учир болгоомжтой хандахыг хүсчээ.
